MKUU WA WILAYA YA SINGIDA AHIMIZA JUU YA LISHE BORA KWA JAMII

Posted on: November 3rd, 2022

Mkuu wa Wilaya ya Singida, Mhandisi Paskasi Muragili ameitaka Manispaa ya Singida, kurejesha huduma ya chakula kwenye shule zote za msingi, ili kuimarisha afya ya akili, mwili na kuongeza ufaulu kwa wanafunzi.

Mhandisi Muragili  ambaye pia ni mwenyekiti wa kamati ya lishe wilaya amesema hayo kwenye  mafunzo ya siku moja kuhusiana na umuhimu wa lishe bora yaliyojumuisha watendaji wa Kata, Wawezeshaji ngazi ya jamii na Wataalamu kutoka ofisi ya mganga mkuu, juu ya masuala ya lishe.

“Miaka ya nyuma tulikuwa na program ya chakula mashuleni, sasa tunairudisha, kila mwanafunzi atapatiwa chakula shuleni…tunaposema chakula, sio lazima iwe ugali au wali, hata uji wenye viini lishe unatosha,”alisema Mkuu huyo wa Wilaya.

Alifafanua kuwa, kuhusiana na suala hilo, tayari ofisi yake imesaini mkataba wa lishe bora na ofisi ya Mkuu wa Mkoa, utakaohakikisha jamii na wadau wengine wa maendeleo, wanashiriki kikamilifu katika kutekeleza zoezi hilo.

Licha ya ofisi hizo kuingia mkataba wa lishe, Manispaa ya Singida kwa upande wake nayo imeingia mkataba kama huo na ofisi ya Mkuu wa wilaya na watendaji wa Kata zote 18, kwa ajili ya kutekeleza programu ya lishe shuleni.

Kwa upande wake, Kaimu Mkurugenzi wa Manispaa ya Singida, Jeshi Lupembe, aliwakumbusha washiriki wa mafunzo hayo, kuhakikisha wanahamasisha  suala la lishe, ikiwa ni pamoja na kuhimiza kilimo chenye kuzalisha na kuzingatia makundi yote matano ya chakula, lengo likiwa ni kuimarisha lishe tangu ngazi ya msingi.

“Lishe ni suala muhimu na ni endelevu kwa ustawi wa afya zetu, tunapozungumzia lishe, tunagusa moja kwa moja afya ya mwili na akili…lazima tujali watoto wetu kwa kuwapatia chakula kinachozingatia viini lishe vyote,”alihimiza Mkurugenzi.

Mratibu wa afya ya uzazi na mtoto Manispaa ya Singida, Joyce Muyenjwa, amebainsha kuwa, mtoto anapopata lishe bora kwenye kipindi cha siku 1,000 tangu kutungwa kwa mimba hadi miaka miwili, inamwepusha na maradhi mbalimbali ikiwemo tatizo la mgongo wazi.

Aidha Joyce amefafanua kuwa, mama mjamzito asipopata lishe bora, itasababisha ubongo wa mtoto kutoumbika vizuri, kupatwa na ugonjwa wa akili, mgongo wazi na hata kuwa na kichwa kikubwa, hivyo kuathiri makuzi yake.

“Mjamzito asipopata lishe bora itamsababishia upungufu wa damu, hna wakati wa kujifungua anaweza kutokwa na damu nyingi hadi kusabaisha kifo, pia asipopata lishe bora itasababisha mtoto asiumbike vizuri tumboni,” alisema Joyce.

Afisa lishe Manispaa ya Singida, Isaac Maseri, amesema hali ya lishe katika mkoa wa Singida kwa utafiti uliofanyika mwaka 2018 ilibainika kuwa  Watoto 78,373 wana udumavu sawa na asilimia  29.8 .

Aidha mesema kuwa, utafiti huo unaonyesha uwepo wa tatizo kubwa la watoto  wenye upungufu wa vitamini A, hali inayo sababisha  udumavu kwa Watoto hao, huku pia ugonjwa wa malaria na minyoo, ukielezwa kuathiri afya zao.

Mafunzo hayo ya siku moja, yaliandaliwa na idara ya afya, ustawi wa jamii na huduma za lishe, katika Halmashauri ya Manispaa ya Singida.