MURAGILI: TUMIENI MATOKEO YA SENSA KATIKA KUFANYA MAAMUZI KWA MAENDELEO STAHIKI KWA WANANCHI

Posted on: July 9th, 2023

Viongozi katika ngazi mbalimbali wilayani Singida wametakiwa kutumia matokeo ya sensa katika kufanya maamuzi yanayohusu sera na mipango ya maendeleo katika maeneo yao.

Hayo yamesemwa na Mkuu wa wilaya ya Singida Mhandisi Paskasi Muragili  aliyemwakilisha mkuu wa mkoa wa Singida Peter Serukamba,  wakati akifungua mafunzo ya usambazaji na matumizi ya takwimu za matokeo ya sensa ya watu na makazi ya mwaka 2022 kwa viongozi mbalimbali wa Halmashauri ya Manispaa ya Singida na Halmashauri ya Singida Vijijini, yaliyofanyika katika ukumbi wa shule ya sekondari Mwenge.

Muragili katika hotuba yake ya ufunguzi, amewataka viongozi hao kutumia matokeo ya sensa katika kufanya maamuzi pia kutathmini utekelezaji wa mipango mbalimbali ya maendeleo kulingana na idadi ya watu kupitia matokeo hayo.

Mkuu huyo wa wilaya ametumia nafasi hiyo kutoa msisitizo kwa waheshimiwa madiwani kutumia matokeo ya sensa katika kutetea kata zao na sio kwa ajili ya matakwa yao binafsi.

Mhandisi Muragili amesema, matokeo hayo ya sensa yataongeza uelewa na uwazi kwa wananchi kutokana na takwimu sahihi zilizopo jambo ambalo litawapa fursa wananchi kuhoji pale maamuzi yatakapofanyika vinginevyo.

Naye Katibu Tawala Mkoa wa Singida Dkt. Fatma Mganga, amepongeza mwitikio mkubwa wa viongozi kuanzia ngazi za vijiji hadi wilaya pamoja na taasisi mbalimbali katika mafunzo hayo , na kuwataka waratibu wa Sensa wa wilaya kusambaza haraka matokeo hayo ya sensa katika ngazi zote ili yaweze kutumika.

Aidha ameagiza watendaji wote wa Vijiji, Mitaa na Kata kuhuisha mara moja taarifa za Sensa katika mbao zao za matangazo ili wananchi waweze kuwa na uelewa na matokeo hayo.

Dkt. Mganga amesisitiza kuwa uwepo wa takwimu hizo ambazo ni matokeo ya sensa 2022 kutarahisisha utekelezaji wa majukumu na hivyo kutoa huduma bora kwa wananchi katika maeneo yote.

Awali akiongea kabla ya mafunzo kufunguliwa Mbunge wa jimbo la Singida Mjini Mussa Sima alisema matokeo ya sensa ni dira kwa mipango endelevu ya Halmashauri ambayo inatoa mwanga wa kufikia malengo kwa maendeleo kusudiwa ya wananchi.

Sima ametoa rai kwa viongozi hao, kutumia fursa hiyo ya mafunzo kwa kukaa na wataalamu katika ngazi za vijiji, mitaa na kata ili kuona namna bora ya kutumia matokeo hayo ili kufikia malengo yao.

Akihitimisha mafunzo hayo Mstahiki Meya wa Manispaa ya Singida Yagi Maulid Kiaratu amesema ni wajibu wa viongozi kwa kushirikiana na wataalamu kupitia matokeo ya sensa kupanga mipango ya maendeleo yenye kuona mbele ili kuweza kutoa huduma stahiki kwa wananchi kutokana na ongezeko la watu .

Mstahiki Meya amepongeza zoezi la Sensa 2022 na kusema ni sensa ya kipekee na ya kidigitali iliyojumuisha mazoezi matatu kwa wakati mmoja  ambapo ameyataja kuwa ni sensa ya watu na makazi, majengo na taasisi zinazotoa huduma pamoja na anwani za makazi.

Kiaratu amesema kutokana na matokeo ya sensa, imeonekana nguvu kazi ni kubwa hapa nchini na hasa Mkoa wa Singida, hivyo kutoa rai kwa vijana na wote wenye uwezo wa kufanya kazi kujikita katika shughuli za uzalishaji badala ya kujiingiza katika shughuli ambazo ni kinyume cha maadali .

Kwa Mujibu wa Meneja wa Takwimu, Ofisi ya Taifa ya Takwimu mkoa wa Singida, Naing’oya Kipuyo, Mafunzo hayo ni mfululilo wa mafunzo ya matumizi na usambazaji wa matokeo ya sensa yanayotolewa kwa makundi mbalimbali ya kijamii na kuendeshwa na Ofisi ya Taifa ya Takwimu pamoja na Ofisi ya Mtakwimu Mkuu wa Serikali ya Mapinduzi ya Zanzibar.

Amesema dhumuni la mafunzo hayo ni kusambaza matokeo ya sensa ya watu na kakazo 2022 na  kuwajengea uwezo  wadau wote wa namna ya kutumia matokeo katika kutekeleza majukumu yao kwa wananchi hasa katika utoaji wa huduma za kijamii, tafiti mbalimbali biashara na uwekezaji.