MWENYEKITI WA CCM MKA WA SINGIDA ARIDHISHWA NA UTEKELEZAJI WA MIRADI YA MAENDELEO

Posted on: February 3rd, 2023

Mwenyekiti wa Chama Cha Mapinduzi Mkoa wa Singida, Martha Mlata, amepongeza kazi nzuri ya utekelezaji na usimamizi wa miradi ya maendeleo  iliyofanywa na Manispaa ya Singida na TANROADS na kusema kuwa  ina kiwango cha ubora kinachostahili.

Mhe. Mlata, katika kuelekea kilele cha maadhimisho ya  miaka 46 ya CCM tangu kuzaliwa amefanyaa ziara ya kutembelea miradi ya maendeleo ndani ya Manispaa ya Singida, ambapo  pamoja na masuala mengine  ameweza pia kujionea hali halisi  ya utekelezaji wa Ilani ya Chama cha Mapinduzi.

Akikagua mradi wa ujenzi wa kalavati 3 katika barabara ya singida- Tabora inayopita katikati ya ziwa Kindai na Munangi, Mlata alipongeza kazi nzuri ya usimamizi wa mradi inayofanywa na TANROADS huku akiwataka wakandarasi wenginge kuiga kazi nzuri inayofanywa na Mkandarasi Kagwa General Supplies Ltd. Wa Singida

Aidha Mwenyekiti huyo amepongeza pia kitendo la TANROADS kutoa kazi ya mradi huo mkubwa kwa  mkandarasi mzawa na kusema jambo  la kuthamini wazawa linaimarisha uzalendo na kuleta mshikamanao.

 “ niwapongeze kwa kazi nzuri ya usimamizi wa mradi huu…….. nawapongeza pia kuwa kuthamini kazi za wazawa  ni jambo jema linaloleta mshikamano”, amesema Mlata.

Akisoma taarifa ya utekelzaji wa mradi huo, Kaimu Meneja wa  TANROADS Mkoa, Mhandisi Msama Kosan Msama, amesema , ujenzi huo ni matokeo ya mvua kubwa zilizonyesha 2019 zilizopelekea maziwa hayo mawili kufurika na kuungana na kusababisha sehemu hiyo ya barabara kujifunga.

Aidha amesema, eneo la tuta kati ya ziwa Kindai na Monangi lenye urefu wa KM1 ni kiungo muhimu kwa kuunganisha barabara kuu ya manyoni- Itigi- Chaya- Tabora hadi Kigoma.

Mhandisi Msama, amefafanua zaidi kuwa ujenzi wa tuta hilo unaotekelezwa katika awamu mbili, unalenga kuondoa tatizo la maji maji kufurika kutoka katika maziwa hayo  nyakati za mvua kubwa  na hivyo kusbabisha usumbufu kwa watumiaji wa barabara hiyo hasa vijiji  vya Mwankoko, Mtunduru, Ighombwe  na Kintandaa.

Amesema , awamu ya kwanza inatekelezwa katika mwaka huu unaoendelea 2022/2023  ambao unahusisha ujenzi wa makalavati makubwa matatu( Box Culverts) kwa ajili ya kupumulia, upanuzi na unyauaji  wa tuta pamoja na ujenzi wa tabaka la changarawe.

Akielezea awamu ya pili ya ujenzi ambayo itatekelezwa mwaka wa fedha 2023/2024 Mhandisi Msama amesema,  awamu hii itahusisha uwekaji wa tabaka la kati, tabaka la juu ya lami nyepesi na kazi za upendezeshaji ikiwemo uwekaji wa taa za barabarani, eneo la mapumziko pamoja na maegezo yake.

Hadi kufikia 31 Januari, 2023 kazi zote zilizotekelezwa ambazo ni ujenzi wa makalavati  makubwa matatu (3) ni sawa na asilimia 31 ya utekelezaji, ambapo kiasi cha Tshs. 444,119.150 kimeshalipwa kwa mkandarasi kati ya Tshs. 1,434,775,000 zilizotengwa kwa ajili ya kutekeleza mradi huu

Miradi Mingine aliyotembelea Mwenyekiti wa Chama cha Mapinduzi Mkoa, Martha Mlata ni pamoja na Ujenzi wa Kituo cha Afya Kata ya Mandewa, Ujenzi wa Zahanati kijiji cha Ititi, na Ujenzi wa Shule mpya ya Sekondari kata ya Uhamaka ambako kote aliendesha zoezi la upandaji miti.