NAIBU KATIBU MKUU OR TAMISEMI AFUNGUA KIKAO CHA TATHMINI YA UTEKELEZAJI WA SHUGHULIZA ZA ELIMU

Posted on: January 27th, 2025

Naibu Katibu Mkuu wa Ofisi ya Rais Tawala za Mikoa na Serikali za Mitaa (OR-TAMISEMI), anayeshughulikia Elimu, Atupele Mwambene, leo Januari 27, 2025, amefungua rasmi kikao kazi cha kutathmini utekelezaji wa shughuli za elimu kwa kipindi cha Julai hadi Desemba 2024.

Kikao hicho cha siku tatu kimefunguliwa katika Ukumbi wa RC Mision, Manispaa ya Singida, ambapo Naibu Katibu Mkuu Mwambene alifungua kikao hicho kwa niaba ya Waziri wa Nchi, Ofisi ya Rais Tawala za Mikoa na Serikali za Mitaa, Mheshimiwa Mohamed Mchengerwa.

Katika kikao hicho, maafisa elimu wa mikoa 26 na maafisa elimu ya awali, msingi na sekondari kutoka halmashauri 184 wameshiriki kwa lengo la kutathmini utekelezaji wa shughuli za elimu na kujadili changamoto na mafanikio yaliyopatikana katika nusu mwaka wa 2024.

Kauli mbiu ya kikao kazi hicho ni “Utekelezaji Majukumu kwa Ufanisi ni Msingi wa Elimu Bora”, ikiwa ni juhudi za kuhakikisha kuwa elimu bora inapatikana kwa ufanisi kupitia ushirikiano na usimamizi madhubuti wa shughuli zote zinazohusiana na sekta ya elimu.

Kikao hiki ni muhimu katika kuhakikisha utekelezaji wa sera na mikakati ya kuboresha elimu nchini unafanyika kwa ufanisi, na kwamba changamoto zinazojitokeza zinafanyiwa kazi kwa haraka na kwa ufanisi.