.PONGEZI KWA KUWA HALMASHAURI INAYOTEMBEA “- DC MURAGILI

Posted on: February 8th, 2024

Manispaa ya Singida imepongezwa kwa kuwa Halmashauri inayotembea kutokana na ukuwaji wake  katika bajeti kutoka Bilioni 3  miaka minne iliyopita na kufikia bilioni 6.3 kulingana na makisio ya bajeti ijayo ya 2024/2025.

Pongezi hizo zimetolewa leo tarehe 08 Februari, 2024 na Mkuu wa Wilaya ya Singida, Mhandisi Paskasi Muragili katika Mkutano maalum wa Baraza la madiwani wa kupitia bajeti  inayoendelea kutekelezwa ya 2023/2024 na kujadili bajeti ijayo ya 2024/2025 , mkutano uliofanyika katika Ukumbi wa Maktaba wa Shule ya Sekondari ya Mwenge.

Muragili amesema bajeti iliyojadiliwa ya mwaka ujao wa fedha 2024/2025 imekuwa kwa asilimia 10 ambapo ni sawa na ongezeko la zaidi ya shs. Milioni 600, na kusema ukuaji huo ni matunda ya uongozi bora na thabiti uliosimamia mabadiliko ya bajeti kutoka bajeti ya manispaa na kuwa bajeti ya wananchi.

“ Tangu muingie madarakani bajeti imekuwa ikipanda kila mwaka na hivi ninaamini  mpaka mnapomaliza miaka mitano mtakua mmefika bajeti ya bilioni 7 na kuandika historia…mmebadilisha bajeti kutoka bajeti ya Manispaa na kuwa bajeti ya wananchi “, amesema Mhandisi Muragili.

Aidha  Muragili amempongeza Mstahiki Meya, wajumbe wa baraza la madiwani kwa kuandika historia kwa kutekeleza miradi ya mapato ya ndani yenye kuacha alama na kuitaja miradi hiyo kwa uchache kuwa ni  ujenzi kituo cha afya kata ya Mtipa, ujenzi wa machinjio mpya iliyo kata ya Kisaki, ununuzi wa magari ya kubeba taka mapya na hayo ni baadhi. 

Ameendelea kusema kuwa  kulingana na bajeti  ijayo ya 2024/2025 Manispaa ya Singida inakwenda kujenga shule ya msingi ya mchepuo wa kiingereza jambo  ambalo amelitaja kuwa ni la kujivunia kwani linakwenda kuacha historia isiyosahaulika.