RAIS SAMIA AMTAKA WAZIRI MKUU KUSIMAMIA UTEKELEZAJI WA VIPAUMBELE VYA SERIKALI YA AWAMU YA SITA

Posted on: November 14th, 2025

Rais wa Jamhuri ya Muungano wa Tanzania Mhe. Dkt. Samia Suluhu Hassan amemtaka Waziri Mkuu mpya Mhe. Dkt. Mwigulu Lameck Nchemba kuongeza kasi ya kusimamia na kutekeleza vipaumbele vyote ambavyo Serikali ya Awamu ya Sita imeahidi wananchi.

Rais Samia amesema hayo leo Novemba, 14, 2025, Ikulu Chamwino Jijini Dodoma wakati wa hafla fupi ya kumuapisha Waziri Mkuu wa Jamhuri ya Muungano wa Tanzania Mhe.Dkt. Mwigulu Lameck Nchemba kufuatia jina lake kuthibitishwa na Bunge Novemba 13, 2025.

Amesema Serikali ya awamu ya sita imewaahidi wananchi mambo mengi akimtaka aongeze kasi ya kusimamia miradi yote ya maendeleo na kuikamilisha kwa muda mfupi.

“Umepokea kijiti kutoka kwa aliyekuwa Waziri Mkuu Mhe. Kassim Majaliwa ambaye amefanya kazi nzuri na kufanikisha haya ambayo tunatamba nayo leo, baadhi ni pamoja na ujenzi wa vituo vya afya, hospitali za kanda na ujenzi wa shule, bila shaka utafuata nyayo zake na kuongeza kasi zaidi” amesisitiza Rais Samia.

Rais Samia ameongeza kuwa Serikali ya awamu ya sita imeahidi mambo mengi kwa wananchi ambayo Waziri Mkuu mpya anatakiwa kuyasimamia akishirikiana na Baraza la Mawaziri ili yaweze kukamilika kutokana na muda wa kuyatekeleza kuwa mfupi pamoja na kutafuta fedha za kukamilisha miradi.

Aidha, amemtaka Waziri Mkuu Mhe.Dkt. Mwigulu Nchemba awe makini kwa kukwepa vishawishi kutoka kwa ndugu ,jamaa, marafiki na watu wengine na badala yake ajikite kutekeleza ahadi za Serikali kwa wananchi.

“Nafasi yako haina rafiki, ndugu wala jamaa, imejaa vishawishi vingi, cha muhimu ni kujua kwamba ni nafasi ya kulitumikia Taifa”, ameeleza Rais Samia.