RAIS SAMIA ATOA MKONO WA FARAJA KWA WENYE UHITAJI WILAYA YA SINGIDA

Posted on: December 24th, 2024

Rais wa Jamhuri ya Muungano wa Tanzania, Dkt. Samia Suluhu Hassan, ametoa mkono wa faraja kwa wafungwa na mahabusu wa Gereza la Wilaya ya Singida, pamoja na watoto wa Kituo cha kulelea Watoto Yatima cha Upendo Home, kilichopo wilayani humo.

Sherehe ya kukabidhi msaada huo zilifanyika Desemba 24, 2024, ikiwa ni sehemu ya kusherehekea sikukuu ya Krismas.

Akizungumza katika hafla hiyo, Katibu Tawala wa Wilaya ya Singida,Bi Naima Chondo, alisema: "Tumekuja kujumuika na uongozi wa Gereza la Wilaya ya Singida na wafungwa waliopo hapa kuwasilisha mkono wa faraja kutoka kwa Mheshimiwa Rais wetu, Dkt. Samia Suluhu Hassan. Tumepokea mkono huu wa faraja kwa sehemu mbili: katika Gereza la Wilaya na Kituo cha Watoto Yatima cha Upendo Home."

Katika mkono wa faraja huo, Naima Chondo alikabidhi msaada mbalimbali kwa Gereza la Wilaya ya Singida, ikiwemo magodoro, sukari, mafuta ya kupikia, sabuni, chumvi, mchele na ng'ombe kwa ajili ya mboga.

Kwa upande wa uongozi wa Gereza, wakati wa kupokea msaada huo, Kamishna Jenerali wa Magereza aliyetumwa na Mkuu wa Magereza, Ssp Makange, alitoa shukrani kwa uongozi wa ofisi ya Mkuu wa Wilaya pamoja na Rais Samia Suluhu Hassan kwa msaada huu muhimu.

Alisema msaada huo utapunguza makali ya mahitaji ya wafungwa na mahabusu, na kuongeza kuwa unalenga kuboresha hali ya kifungo na kuwapa matumaini.

Aidha, kituo cha Upendo Home kilipokea mchele, soda, biscuit, sabuni, mafuta, nyama na viungo.

Hii ni sehemu ya juhudi za Rais Samia Suluhu Hassan katika kuhakikisha kuwa wananchi, ikiwa ni pamoja na wafungwa na watoto yatima, wanapata msaada muhimu katika kipindi cha sikukuu na zaidi ya hapo.