RAS SINGIDA: UJENZI WA SHULE MPYA, CHUO MANISPAA YA SINGIDA UWE WA KISASA....

Posted on: January 20th, 2025

Katibu Tawala wa Mkoa wa Singida (RAS), Dkt. Fatma Mganga, amesisitiza kuwa ujenzi wa shule mpya za Sekondari na Chuo cha Ufundi katika Halmashauri ya Manispaa ya Singida unapaswa kufanywa kwa viwango vya juu na kuwa na mazingira ya kisasa, kutokana na namna ambavyo Serikali imewekeza fedha katika miradi hiyo.

Dkt. Mganga aliyasema hayo, Januari 20, mwaka huu, alipotembelea na kukagua ujenzi wa shule mbili mpya za Sekondari, Mwaja na Minga, pamoja na kuangalia ujenzi wa awali wa Shule ya Amali (Ufundi). Aidha, alikagua mabweni, madarasa na vyoo katika shule za Sekondari za Mandewa na Mwankonko, ambazo zinatarajiwa kupokea wanafunzi wa Kidato cha Tano ifikapo Julai mwaka huu.

Katika ziara hiyo, Dkt. Mganga alisisitiza kuwa ubora wa miundombinu, viwango vya mazingira safi, na upandaji wa miti vitafanya shule hizo mpya kuonekana za kipekee, jambo ambalo litakuwa na manufaa kwa wanafunzi kwa kutoa mazingira bora ya kujifunzia.

"Serikali imewekeza fedha nyingi katika miradi hii, hivyo ni muhimu kuhakikisha kuwa shule hizi zinakuwa na mazingira bora na ya kisasa," alisema Dkt. Mganga.

Aidha, alieleza kuwa shule mpya zinapaswa kuwa na tofauti kubwa na shule nyingine zilizopo kwa kuboresha mpangilio wa majengo, muonekano na sare za wanafunzi.

 "Kwa kuwa hizi ni shule mpya, tunapata fursa ya kufanya mabadiliko hayo, hivyo mpangilio na muonekano wa shule hizi lazima uwe wa kipekee," alisisitiza.

Dkt. Mganga pia alieleza kuwa ni muhimu kwa shule hizi mpya kuwa na walimu  na bodi za shule kuundwa mapema, ili majukumu ya uendeshaji ya shule hizo yaanze mara moja pindi zitakapokamilika.

Ziara hiyo ya Dkt. Mganga inadhihirisha dhamira ya Serikali ya kuboresha elimu katika Mkoa wa Singida kwa kuhakikisha kuwa shule za kisasa zinajengwa na kuwa na mazingira bora kwa wanafunzi kama ambavyo Serikali ya Awamu ya Sita imekuwa ikisisitiza na kutoa fedha nyingi.