RC DENDEGO AZINDUA MIKOPO YA 10% KWA VIKUNDI VYA WANAWAKE MANISPAA YA SINGIDA

Posted on: February 15th, 2025

Leo, Februari 15, 2025, historia imeandikwa kwa mara nyingi katika Halmashauri ya Manispaa ya Singida wakati Mkuu wa Mkoa wa Singida, Mhe. Halima Dendego, alizindua rasmi mikopo ya asilimia 10 kwa ajili ya vikundi vya wanawake, watu wenye ulemavu na vijana, ambapo kiasi cha shilingi bilioni 1.1 kitatolewa kwa mwaka wa fedha 2024/25.

Uzinduzi huu ulifanyika katika Ukumbi wa Mabula Social Hall, Manispaa ya Singida, ambapo Mhe. Dendego alitangaza rasmi awamu ya kwanza ya utoaji mikopo yenye thamani ya shilingi milioni 168.

Mikopo hii ni sehemu ya utekelezaji wa mpango wa Serikali wa kutoa mikopo kwa vikundi vinavyohusisha makundi hayo muhimu, huku lengo kuu likiwa ni kukuza uchumi wa mkoa na taifa kwa ujumla na fedha hizo za mapato ya ndani ya Halmashauri.

Mhe. Dendego alipongeza Manispaa ya Singida kwa hatua hiyo muhimu na aliwahimiza wanufaika kuhakikisha fedha hizo zinatumiwa kwa malengo yaliyokusudiwa ili kuongeza uzalishaji na kuboresha hali ya maisha.

Aliwakumbusha vikundi vyote kuhakikisha kuwa wanatumia mikopo hii kama chachu ya kuboresha maisha yao na kuchangia katika kukuza uchumi wa mkoa.

"Niwapongeza sana Manispaa ya Singida kwa hatua hii ya kutoa mikopo ya shilingi milioni 168 leo, lakini tufahamu kwamba hii ni sehemu ya shilingi bilioni 1.1, fedha ambazo ni mali ya vijana, wanawake na watu wenye ulemavu. Tushirikiane kwa pamoja ili fedha hizi ziweze kutumika kwa faida ya wananchi wetu na kuongeza pato la mkoa wetu na taifa letu," alisema Mhe. Dendego.

Pia, aliwahimiza watendaji wa halmashauri kuongeza kasi ya utoaji wa mikopo na kushughulikia malalamiko kutoka kwa baadhi ya wananchi wanaosema kuwa hawapati huduma za haki. "Tutahakikisha kila mtu anapata huduma bila kubaguliwa, lakini uvumilivu pia ni muhimu katika kufuata taratibu zilizowekwa," alisisitiza Mhe. Dendego.