RC SERUKAMBA ARIDHISHWA NA KAZI YA UKAMILISHAJI WA MIRADI YA AFYA MANISPAA YA SINGIDA

Posted on: October 25th, 2023

Serikali Mkoani Singida imeridhishwa na shughuli ya ukamilishaji miradi ya afya na kuwataka watumishi wa sekta ya afya waliopangwa kutoa huduma katika vituo hivyo, kuhakikisha wanatoa huduma stahiki kwa wananchi.

Mkuu wa Mkoa  wa Singida Peter Serukamba amesema hayo Oktoba 25, 2023 katika ziara yake ya kutembelea miradi ya sekta ya afya iliyokuwa katika hatua mbalimbali za ukamilisha na ambayo kwa sasa imekamilika na kutoa huduma.

Serukamba, amewataka watumishi waliopangwa kutoa huduma katika vituo vipya vya afya na zahanati kuhakikisha watatoa huduma bora kwa wananchi na kukaa vituoni muda wote wa kazi  na kwamba hatomvumilia ambaye atashindwa kutekeleza majukumu yake ya kazi.

Aidha Serukamba pamoja na  kuridhishwa na kufurahishwa na kazi ya ukamilishaji miradi ya afya, amemtaka mhandisi wa Manispaa kusimamia miradi na kuhakikisha inatekelezwa  kwa kiwango cha ubora kulingana na thamani halisi ya fedha ( Value for Money).

Serukamba pia ametoa maelekezo kwa Mkurugenzi wa Manispaa Jeshi Lupembe na timu ya menejimenti ya kutembelea miradi mara kwa mara pindi inapotekelezwa pamoja na kukagua mpango kazi wa mafundi ili kuhakikisha kasi ya ujenzi inaendana na mpango kazi wao na kuweza kukamilisha kazi kwa wakati.

“…… mafundi ambao kazi zao zinasuasua, na kasi ni ndogo sitisha mkataba wake, tunataka mafundi wanaoendana na kasi lakini pia wanazingatia ubora”, amesisitiza Serukamba.

Akihitimisha ziara yake katika kituo cha Afya Mandewa, Mkuu wa Mkoa Peter Serukamba amesema anatarajia kuanza ziara kwenye halmashauri zote saba za mkoa wa Singida lengo likiwa ni  kukagua miradi yote inayotekelezwa katika kila halmashauri ili kubaini mapungufu lakini pia kuona wapi wamefanya vizuri.

Jumla ya Vituo vya kutolea huduma (4) vimeweza kutembelewa katika Manispaa ya Singida  vikiwemo vituo 02 vya afya vya Mandewa na Mtipa na zahanati 02 za Ititi na Unyianga. Vituo vyote 04 vimekamilika kwa ubora na vinatoa huduma kwa wananchi