SEKRETARIETI YA MAADILI YA VIONGOZI WA UMMA YATOA MAFUNZO KWA MADIWANI MANISPAA YA SINGIDA

Posted on: January 23rd, 2025

OFISI ya Rais, Sekretarieti ya Maadili ya Viongozi wa Umma Kanda ya Kati, leo Januari 23, 2025, imeendesha mafunzo kwa Waheshimiwa Madiwani pamoja na Wakuu wa Idara na Vitengo wa Halmashauri ya Manispaa ya Singida, ikiwa ni juhudi za kuhakikisha viongozi hao wanazingatia maadili ya umma na kufuata taratibu na kanuni za utumishi wa umma kama inavyoelekezwa na Serikali.

Mafunzo hayo yamefanyika katika Ukumbi wa Maktaba ya Mwenge Sekondari, Manispaa ya Singida, na yameendeshwa na Afisa wa Maadili kutoka Kanda ya Kati Dodoma, Bw. Joshua Mwambande.

Katika mafunzo hayo, Afisa Mwambande alisisitiza umuhimu wa viongozi hao kufanya kazi kwa ufanisi na kwa kuzingatia miiko na maadili ya utumishi wa umma.

Akifungua mafunzo hayo, Mstahiki Meya wa Manispaa ya Singida, Mhe. Yagi Kiaratu, aliwataka viongozi hao kuwa mfano mzuri wa kuigwa katika utekelezaji wa majukumu yao ya kila siku.

Aliongeza kuwa, viongozi wa Manispaa ya Singida wanapaswa kutenda haki na kuhakikisha wanatoa huduma bora kwa wananchi, huku wakiendelea kuzingatia sheria, kanuni, na taratibu za utumishi wa umma.

Mafunzo hayo ni sehemu ya juhudi endelevu za Serikali za kuimarisha maadili katika utendaji wa viongozi wa umma na kuhakikisha ufanisi katika utekelezaji wa sera na miradi ya maendeleo.