SERIKALI KUUFUFUA MRADI WA UMWAGILIAJI KILIMO CHA MBOGAMBOGA KISASIDA

Posted on: October 7th, 2022

MKOA wa Singida unatarajia kuongeza uzalishaji wa alizeti hadi kufikia tani 492,485 kwa msimu ujao wa kilimo (2022/2023), kutoka tani 260,382, zilizozalishwa wakati wa msimu uliopita (2021/2022), tani zitakazochangia asilimia 44.2 ya mafuta yote ya kula nchini.

Akizungumza kwenye kikao na Waziri wa kilimo Hussen Bashe mkoani Singida, juu ya mkakati wa mkoa katika kuongeza alizeti, mwenyekiti wa kamati maalumu, Justice Kijazi, ambaye pia ni mkurugenzi mtendaji wa halmashauri ya wilaya ya Ikungi, amesema zinahitajika mbegu tani 2,900 ili kutosheleza ekari 631,391, zinazomilikiwa na wakulima, taasisi, vikundi na vyama vya msingi (AMCOS), kwa msimu ujao wa kilimo (2022/2023).

“Uzalishaji wa miaka mitano iliyopita tangu mwaka 2017-2022 haujawahi kutosheleza viwanda vya mkoa wetu wa Singida, ambao ulikuwa tani 97,757.1 kwa msimu wa 2017/2018, lakini uzalishaji wa juu ni tani 260,382 za mwaka jana, yaani msimu wa 2021/2022,” alifafanua Kijazi.

Kwa upande wake Waziri Bashe, akizungumza juu ya mradi wa umwagilianji kilimo cha mbogamboga uliopo Kijiji cha Kisasida, kata ya Unyambwa Manispaa ya Singida, amepongeza juhudi zinazofanywa na uongozi wa halmashauri hiyo, katika kuhakikisha mradi huo unafufuliwa ili uweze kuleta tija kwa jamii.

Shughuli za mradi wa mbogamboga uliopo katika eneo la Kisasida, kata ya Unyambwa, zimesimama kwa muda mrefu sasa, kutokana na changamoto mbalimbali za kimundombinu, hali iliyoathiri uzalishaji.

Kutokana na changamoto hizo , Waziri Bashe aliridhia ombi la kufufua mradi huo lililowasilishwa na Mbunge wa Jimbo la Singida Mjini Mhe. Mussa Sima, na kuwaagiza wataalamu wa wizara kukutana na uongozi wa Manispaa, tayari kwa ajili ya utekelezaji.

Waziri Bashe aliyemaliza ziara ya siku tatu mkoani Singida leo oktoba 7, 2022, amesema, pamoja na nia nzuri ya serikali ya awamu ya sita chini ya Rais Samia Suluhu Hassan kwa Watanzania, amepongeza juhudi za kuipatia wizara hiyo fedha za bajeti ya mwaka wa fedha 2022/2023, kwa ajili ya maenndeleo ya kilimo.

Kuhusu mkakati wa kilimo cha alizeti, Bashe ameipongeza kamati ya kuratibu mkakati wa kuongeza uzalishaji wa alizeti 2022/2023, nakuitaka inagalie uwezekano wa kuinua kilimo cha mazao mengine, hasa yale ya chakula, ili yaweze kuleta tija zaidi kibiashara.

Naye Mkuu wa Mkoa wa Singida Peter Serukamba, alimshukuru Waziri Bashe na kuahidi kuusimamia vizuri mpango huo, ili taifa liweze kujitosheleza kwa mafuta ya kula yanayozalishwa nchi.

Serukamba amesema kuwa, atasimamia maagizo ya serikali, hasa ya wakulima kupatiwa pembejeo za ruzuku, ikiwemo mbegu tani 1,262.5 za alizeti pamoja na mbolea ili waweze kutekeleza mkakati huo kwa tija.

Mkoa wa Singida ni kati ya mikoa mitatu nchini, ikiwemo mikoa ya Manyara na Dodoma, iliyopewa kipaumbele katika kilimo cha alizeti ili kukabiliana na changamoto ya upungufu wa mafuta ya kula, hali inayoigharimu serikali  kiasi kikubwa cha fedha, kwa ajili ya kuagiza bidhaa hiyo kutoka nje ya nchi.