SERIKALI YATOA FEDHA BILIONI 51 KUWEZESHA KAYA MASIKINI KUPITIA TASAF KWA MWAKA WA FEDHA 2023/2024

Posted on: August 27th, 2023

Serikali imetoa fedha  Tshs, Bilioni 51 kwa ajili ya walengwa wa Mpango wa Kunusuru kaya Masikini (TASAF) kwa mwaka 2023 ili walengwa hao waendelee kupata ruzuku ya kujimu na kuboresha maisha yao.

Naibu waziri Ofisi ya Rais, Menejimenti ya Utumishi wa Umma na Utawala Bora, Mhe. Ridhiwan Kikwete alisema hayo jana tarehe 26 Augost, 2023 wakati akiongea na walengwa wa TASAF na wananchi wa Kijiji cha Ughaugha, kata ya Unyamikumbi Manispaa ya Singida.

Naibu waziri Kikwete amesema Serikali imeshakamilisha mchakato wa malipo kwa walengwa na kuhimiza malipo hayo kwa wanaostahili yafanyike haraka huku akitoa agizo la kushughulikiwa mara moja kwa rufaa za walengwa ambao wamepata changamato katika malipo ili kuwaondoa katika kadhia ya kuzubiri malipo yao.

Naibu Waziri Kikwete, ametoa onyo kwa waratibu wa TASAF katika Halmashauri kutofanya mchezo na fedha za walengwa kwani uzembe wa aina yoyote ile hautovumiliwa.

“Mheshimiwa Rais ameelekeza fedha zije kwenu wananchi, na sisi wasaidizi wake tunapokuja hapa moja ya jukumu letu ni kuhakikisha maelekezo ya Rais yametekelezwa na walengwa mnaendelea kunufaika na fursa ambazo Rais anaendelea kutufungulia”, amesema Naibu Waziri Ridhiwani Kikwete

Pamoja na hayo, Naibu Waziri huyo, ambaye wizara yake ndiyo yenye jukumu la kusimamia Mradi wa TASAF, ameeleza kuridhishwa na utekelezaji wa mkakati wa kuondoa umasikini katika kaya kutokana na mafanikio waliyopata wanufaika wa TASAF katika Kijiji cha Ughaugha.

Kikwete ametoa agizo kwa uongozi wa TASAF makao makuu kutenga fedha za ujenzi wa nyumba ya mganga (Two in one) ambayo TASAF iliahidi kuijenga baada ya kupokea maombi kutoka zahanati ya Ughaugha ambayo ilijengwa kupitia Mradi wa TASAF.

Kwa upande wake Mstahiki Meya wa Manisaa ya Singida Yagi Maulid Kiaratu, amesema changamoto kwa walengwa ni chache ambazo zipo katika utaratibu mzima wa malipo hasa kwa wazee na kwamba anaamini  utaratibu huo utazoeleka kadiri malipo yanavyoendelea kufanyika.

Mstahiki Meya Kiaratu, amesema Manispaa ya Singida inaendelea kutoa elimu kwa walenga kuhusu kufuzu kwa Mradi na kwamba Halmashauri itajipanga ili kuona namna bora ya kuwapokea walengwa watakaofuzu ili kuwawezesha kuwa na maendeleo endelevu.

Naye Mratibu wa TASAF Manispaa ya Singida Bi. Stara Beka amesema katika kipindi cha pili cha mpango wa Kunusuru Kaya Masikini jumla ya Kaya 4395 zilitambuliwa.

Ameyataja malengo ya Mradi kuwa ni kuziwezesha kaya maskini kuongeza kipato, kuzipa fursa za kujiendeleza pamoja na kuziwezesha kugharamia mahitaji muhimu