SHULE SITA ZA SEKONDARI ZASHIRIKI TAMASHA LA ELIMU

Posted on: October 4th, 2022

Shule sita (06) za sekondari katika Manispaa ya Singida zimeshiriki tamasha la elimu mwaka huu (2022/2023), kwa ajili ya kuinua vipaji vya wanafunzi, hali itakayoimarisha elimu ya makuzi na malezi ya vijana.

Mratibu wa Tamasha hilo, makamu Mkuu wa Taaluma shule ya sekondari Mwenge, Mwalimu Triphonia Shirima, alisema program hiyo ni maalumu kwa makuzi na malezi ya vijana, inayojumuisha mafunzo sahihi juu ya rushwa, Afya, uendelezaji wa taaluma, Sanaa ya uimbaji na uchoraji.

Mwalimu Shirima alisema kuwa, pamoja na program hiyo wanafunzi  wa shule hizo sita, ikiwemo wenyeji Mwenge, Utemini, Kindai, Mitunduruni, Dr. Salmin na Mughanga, wameshiriki pia maonesho ya sayansi.

Shirima alifafanua kuwa, matarajio ya Tamasha hilo ni kuleta mabadiliko makubwa ya fikra na mtizamo chanya kwa wanafunzi kujitambua na kujiwekea malengo chanya, kwa matarajio ya baadae.

“ Kwa Tamasha hili, naamini wanafunzi wa vidato vya chini watajenga ari ya kuendelea na elimu ya juu ya sekondari, hali kadhalika wale wa vidato vya juu nao watakuwa na matamanio ya kuendelea na elimu ya vyuo” alisema Shirima.

Tamasha hilo la elimu, ni la kwanza kufanyika katika Manispaa ya Singida, na limeshirikisha jumla ya wanafunzi 1,045.