SINGIDA YAJIPANGA KUWA KATI YA MIKOA TATU BORA KIUCHUMI

Posted on: August 28th, 2024

Mkuu wa Mkoa wa Singida, Mhe. Halima Dendego, ametoa maelekezo mapya kwa viongozi wa mkoa huo na kuweka malengo ya kubadilisha hali ya kiuchumi katika Mkoa wa Singida.

Akizungumza leo wakati akifungua kikao kazi cha siku tatu kinachowakutanisha viongozi wa ngazi mbalimbali wa mkoa, wilaya, na tarafa, Dendego alisisitiza dhamira yake ya kuhakikisha Singida inaingia kwenye orodha ya mikoa mitatu bora kiuchumi nchini.

“Mipango yetu ni kuhakikisha Singida inakuwa miongoni mwa mikoa mitatu bora kiuchumi nchini. Tunataka kupindua meza kibabe na kuwa na uchumi wa uhakika,” alisema Mhe. Dendego.

Ameongeza kuwa matarajio yake ni kuona viongozi hao wakitoa mchango wa maana utakaosaidia kuleta mabadiliko chanya ndani ya mkoa wa Singida. Katika kikao hicho, Dendego alisisitiza umuhimu wa ushirikiano wa ngazi zote za maamuzi kuanzia katibu tarafa hadi ngazi ya mkoa.

Mkoa wa Singida, ulioko katikati ya Tanzania, unategemea sana kilimo na biashara kwa ajili ya uchumi wake. Mazao makuu yanayozalishwa katika mkoa huo ni vitunguu, alizeti, wele, dengu, viazi, langilanga (mtama), na mahindi.