SINGIDA YAPOKEA TRILIONI 1.7 KUTOKA SERIKALIKUU KWA MIAKA 3

Posted on: August 19th, 2024

Mkoa wa Singida umepokea kiasi cha Shilingi Trilioni 1.7 kutoka Serikali Kuu katika kipindi cha miaka mitatu iliyopita, fedha hizi zikitumika katika miradi ya maendeleo na shughuli nyingine muhimu.

Mkuu wa Mkoa wa Singida, Mhe. Halima Dendego, alibainisha hayo Agosti 19, 2024, alipokuwa akihitimisha ziara ya Spika wa Baraza la Wawakilishi wa Serikali ya Mapinduzi Zanzibar, Mhe. Zubeir Ali Maulid. Ziara hiyo ya siku nne ilitoa fursa ya kuonyesha maendeleo yaliyopatikana mkoani Singida.

Mhe. Dendego alifafanua kuwa wastani wa mapato yaliyokusanywa kupitia Mamlaka ya Mapato Tanzania (TRA) ni Shilingi Bilioni 12.382 kwa mwaka. Kwa mwaka wa fedha 2023/2024, TRA imekusanya zaidi ya asilimia 101.6 ya malengo yaliyowekwa. Aidha, Halmashauri saba za Mkoa wa Singida zilikusanya mapato ya Shilingi Bilioni 16.285 kwa mwaka, ambapo kwa mwaka 2023/2024, zilikusanya mapato kwa asilimia 110, ikionesha ongezeko la mapato ya ndani.

Mhe. Dendego alieleza kuwa Shilingi Bilioni 3.068 zilitolewa kwa mikopo ya vikundi vya wanawake, vijana, na watu wenye ulemavu katika miaka mitatu iliyopita. Hata hivyo, baada ya kusitishwa kwa mikopo hiyo, Shilingi Bilioni 2.258 zimetengwa kwa ajili ya vikundi hivyo baada ya mwongozo kutoka Serikali.

Kuhusu Uchaguzi wa Serikali za Mitaa utakaofanyika Novemba 27, 2024, Mhe. Dendego alithibitisha kuwa Mkoa wa Singida umejiandaa kwa amani na usalama, huku akisisitiza umuhimu wa kuzingatia misingi ya demokrasia.

Aidha, alisifu mpango wa stakabadhi ghalani ulioimarisha bei ya kilo moja ya dengu kutoka Shilingi 1,500 hadi Shilingi 2,042.

Kwa upande wake, Spika Maulid alipongeza ushirikiano mzuri uliopo kati ya Serikali na Chama Cha Mapinduzi (CCM) Mkoa wa Singida, akisisitiza umuhimu wa mshikamano huo kuimarishwa ili kuhakikisha uchaguzi ujao unafanyika kwa amani. Alitoa wito kwa viongozi wa Serikali na Chama kuendelea kufanya kazi kwa ushirikiano wa karibu ili kufanikisha malengo ya kitaifa.