STENDI BUBU ZA MAGARI YA ABIRIA ZA DHIBITIWA SINGIDA MANISPAA

Posted on: November 10th, 2021

Halmashauri ya Manispaa ya Singida imejipanga kuhakikisha haipotezi mapato yake yatokanayo na ushuru wa magari ya abiria kwa kudhibiti stendi zisizo rasmi zilizopo katika maeneo mbalimbali katika halmashauri hiyo.

Hayo yalielezwa na mtaalamu kutoka Manispaa ya Singida Bi. Siglinda Mdemu ambaye alikuwa akiwasilisha mada katika kikao cha pamoja baina ya wataalam wa Manispaa na wadau wa vyombo vya usafiri wa abiria ambao ndiyo walengwa wakuu wa kikao hicho.

Aliendelea kusema kumekuwa na ukiukwaji mkubwa wa sheria zinazosimamia usafiri wa abiria hivyo kusababisha kuibuka kwa stendi bubu nyingi mitaani hali inayopelekea upotevu wa mapato ya Manispaa pamoja na uchafuzi wa mazingira.

Katika majadiliano wadau hao kwa pamoja walikubaliana kuwa stendi zitumike kama zilivyopangwa ambapo mabasi makubwa yanayofanya safari ndani ya mkoa yatumie stendi kuu ya mabasi ya Misuna na kwa magari madogo ya abiria  kutumia stendi  ya vumbi iliyopo misuna  kama zilivyokusudiwa.

Aidha waliongeza kuwa stendi ya vumbi ambayo ni ya  magari madogo ya abiria ina eneo kubwa na la kutosha hivyo kuiomba mamlaka (LATRA)  wakishirikiana na Jeshi la Polisi kitengo cha Usalama Barabarani kusimamia sheria, taratibu  na kanuni zinazohusu suala zima la usafiri wa abiria ili kudhibiti stendi bubu.

Aidha wameomba viongozi wa kisiasa kutoingilia maamuzi yanayofikiwa na wadau ama viongozi wa serikali kwani kwa kufanya hivyo ni kukiuka taratibu, kanuni na sheria za usimamizi wa vyombo vya usafiri.