TAASISI ZASHAURIWA KUWASILISHA MIPANGO YA SHUGHULI ZA MAENDELEO KATIKA KIJIJI/KATA MIRADI INAPOTEKELEZWA

Posted on: December 12th, 2023

Taasisi za umma zinazotekeleza miradi ya maendeleo katika maeneo mbalimbali ndani ya Manispaa ya Singida, zimeshauriwa kuwasilisha mipango yao ya utekekezaji wa miradi kwenye Kijiji/kata miradi inapotekelezwa ili iweze kufahamika vyema kwa wananchi.

Mwenyekiti wa Chama Cha Mapinduzi (CCM) wilaya ya Singida Mjini , Bi Lucia Mwiru ametoa ushauri huo katika Mkutano wa Halmashauri Kuu ya CCM wilaya Singida Mjini uliokaa kujadili utekelezaji wa ilani ya uchaguzi 2020/2025, uliofanyika katika ukumbi wa chou cha Maendeleo ya Wananchi (FDC), Manispaa ya Singida.

Mwiru amesema, wananchi wanahaki ya kujua kinachoendelea katika eneo lao na kwamba wakijulishwa mapema, kutasaidia kupunguza migogoro wakati wa utekelezaji wa mradi.

Amezitaja taasisi hizo kuwa ni Shirika la umeme nchini (TANESCO), Mamlaka ya maji safi na usafi wa mazingira (SUWASA), Wakala wa barabara za mjini na vijijini (TARURA) na Wakala wa barabara nchini (TANROADs) kufanya hivyo kwa kuwa miradi yao inagusa moja kwa moja Maisha ya kila siku ya jamii.

Amesema mipango hiyo ikiwasilishwa katika Kata/ Kijiji ambapo mradi huo unaenda kutekelezwa kutawawezesha wajumbe wa mkutano huu ambao ni wenyeviti na makatibu wa siasa katika kata kuisemea vyema miradi hiyo kwa wananchi na hivyo kuondoa mashaka ama vikwazo wakati wa utekelezaji.

Pamoja na hayo wajumbe wa mkutano huo wamepongeza kazi nzuri zinazofanya na Mkuu wa wilaya ya Singida Mhandisi Paskasi Muragili katika kuongoza, kushauri na kusimamia kwa umakini shughuli za maendeleo katika Halmashauri ya Manispaa ya Singida .

“ mkuu wetu wa wilaya anastahili pongezi kwani anajituma, anashauri na kusimamia vizuri shughuli za maendeleo katika wilaya yake yenye halmshauri mbili bila kuchoka, si jambo rahisi …” amesema Mwenyekiti Mwiru.

Katika kuthamini mchango wake, Kamati ya Siasa ya wilaya imeweza kumpatia cheti na barua ya pongezi mkuu huyo wa Wilaya kwa mchango wake katika shughuli za maendeleo, utii na uwajibikaji mahiri katika majukumu yake ya uongozi.

Pongezi hizo zilielekezwa pia kwa Mstahiki Meya wa Manispaa ya Singida, Yagi Kiaratu, ambaye pia alitunukiwa cheti kutokana na usimamizi mzuri na kujituma kwake katika shughuli za maendeleo, lakini pia Mkurugenzi wa Manispaa ya Singida Jeshi Lupembe , aliyepatiwa barua ya pongezi kutokana na utekelezaji mzuri wa ilani ya CCM kutokana na kujituma kwake na kuwa kiungo baina ya chama na serikali.

Awali kabla ya mkutano kuanza, wajumbe wa mkutano wa Halmashauri kuu ya CCM wilaya ya Singida Mjini, walipata nafasi ya kutembelea miradi ya maendeleo inayoendelea kutekelezwa na ile iliyokamilika, jambo lililoamsha hamasa na ari ya kusimamia vyema miradi katika maeneo yao ikiwa ni shukrani kwa Mheshimiwa Rais wa Jamhuri ya Muungano wa Tanzania, Dkt. Samia Suluhu Hassan, kutokana na nia yake thabiti ya kuwaletea wananchi wake Maendeleo ambayo imejidhihirisha katika miradi hiyo waliyoitembelea.

Aidha wajumbe hao wamepongeza matumizi mazuri ya fedha za mapato ya ndani yaliyowezesha kutekelezwa kwa mipango thabiti ya maendeleo ambayo matunda yake yameonekana katika miradi mbalimbali ya maendeleo ukiwemo mradi mkubwa wa ujenzi wa kituo kipya cha Afya kata ya Mtipa.