TAKUKURU: SIMAMIENI MIRADI KWA UMAKINI NA UADILIFU MKUBWA

Posted on: May 31st, 2023

Taasisi ya Kuzuia na kupambana na Rushwa (TAKUKURU) Mkoa wa Singida imewataka walimu wakuu, kamati za ujenzi na mafundi kusimamia kwa umakini na uadilifu mkubwa ujenzi wa miundombinu ya shule za msingi inayojengwa kupitia mradi wa BOOST.

Kamanda wa Takukuru Mkoa wa Singida, Mzalendo Udege, amesema hayo katika mafunzo yaliyoandaliwa na ofisi yake yaliyowalenga Walimu wakuu, madiwani, watendaji wa Kata, wajumbe wa kamati za ujenzi za shule na mafundi wanaotekeleza mradi huo wa BOOST.

Mzalendo amesema, lengo la Mafunzo hayo  ni kwa ajili ya kupitishana katika mwongozo wa utekelezaji wa mradi wa BOOST lakini pia walengwa wa mafunzo kuweza kuelezea changamoto wanazokutana nazo katika utekelezaji wa mradi na kuweza kuzitatua kwa pamoja.

Kamanda huyo amewataka washiriki hao kuzingatia sheria na taratibu za manunuzi ili kuepuka kusababisha hoja na hivyo kuhimiza suala zima la uadilifu na uwazi.

Amesema kamati zilizoundwa zishirikishwe kikamilifu na kila kamati iwajibike katika dhamana waliyopewa na kwa kufanya hivyo kutarahisisha mradi kutekelezeka kwa urahisi na kwa wakati.

“…tuzingatie uadilifu na uzalendo, fedha za mradi sio za kulipana posho…tuwe na uchungu na miradi yetu kwani ni mali ya wananchi..tuache alama nzuri katika miradi tunayoisimamia” amesema Mzalendo.

Pamoja na hayo, Kamanda huyo wa Mkoa pia amewataka washiriki na hasa wahandisi kuhakikisha manunuzi yanaendana na mahitaji halisi ya vifaa, fundi aliyepatikana asiwe na zabuni ya kazi nyingi na usimamizi shirikishi kwa viongozi wa chama na serikali pamoja na wananchi ili kuwezesha utekelezaji wa mradi kulingana na muda.

Halmashauri ya Manispaa ya Singida imepokea zaidi ya Shs. Blioni 1 kwa ajili ya utekelezaji wa mradi wa BOOST ambapo shule mpya 2, madarasa  04 ya awali, vyumba 15 vya madarasa,   matundu 13 ya vyoo vinajengwa kupitia mradi huu unaotarajiwa kukamilika Juni, 2023.