TWENDEBUTIAMA YAWAKUMBUKA WANAFUNZI WENYE MAHITAJI MAALUM MANISPAA YA SINGIDA

Posted on: July 10th, 2025

Kampeni ya Twende Butiama inayodhaminiwa na kampuni ya mawasiliano ya Vodacom Foundation kwa kushirikiana na Benki ya Stanbic, imewakumbuka wanafunzi wenye mahitaji maalum katika Manispaa ya Singida kwa kuwapatia msaada wa vifaa mbalimbali.

Kupitia kampeni hiyo, shule nne zenye watoto wenye mahitaji maalum zimenufaika na msaada wa magodoro 30, vitanda 5, viti 10, meza 10, shuka 20 pamoja na viti mwendo (wheelchairs) 6. Aidha, miti 100 imepandwa katika maeneo ya shule hizo ikiwa ni sehemu ya juhudi za kutunza mazingira.

Akizungumza kwa niaba ya Mkurugenzi wa Manispaa, Mkuu wa Divisheni ya Elimu ya Awali na Msingi, Omary Maje aliwashukuru waandaaji wa kampeni hiyo na wadhamini wake kwa moyo wa kusaidia jamii, hususan watoto wenye mahitaji maalum.

“Tunashukuru sana Twende Butiama, Vodacom na Stanbic kwa kuziwezesha shule zetu kupata vifaa hivi. Ni jambo jema na tunawaomba waendelee na moyo huu,” alisema Maje.

Ikumbukwe kuwa Kampeni ya TwendeButiama lengo lake limekuwa ni kumuenzi Baba wa Taifa, Hayati Mwalimu Julius Kambarage Nyerere ambapo kampeni hiyo itahitimishwa Oktoba 14, 2025 Butiama mkoani Mara.