UFAULU KIDATO CHA NNE MANISPAA YA SINGIDA WAPANDA

Posted on: January 25th, 2025

Katika matokeo ya mitihani ya kidato cha nne kwa mwaka 2024, Halmashauri ya Manispaa ya Singida imeonyesha ongezeko la ufaulu ambapo wastani wa ufaulu umeongezeka kutoka asilimia 84 mwaka 2023 hadi asilimia 91.7 mwaka huu.

Kwa mujibu wa matokeo hayo, jumla ya watahiniwa 2030 walifanya mtihani huo, ambapo wasichana walikuwa 1102 na wavulana 928.

Ufaulu huo umejumuisha daraja mbalimbali, ambapo wanafunzi 110 wamepata daraja la kwanza, wakiwa wavulana 67 na wasichana 43. Wanafunzi 130 wameshika daraja la pili, wakiwa wavulana 130 na wasichana 121. Daraja la tatu limetolewa kwa wanafunzi 391, ikiwa ni wavulana 195 na wasichana 196. Aidha, daraja la nne limepatikana na wanafunzi 1278, ikiwa ni wavulana 536 na wasichana 742. Hata hivyo, wanafunzi 182, ikiwa ni wavulana 68 na wasichana 114, wamepata daraja la mwisho (zero).

Katika tathmini ya jumla, shule ya St. Carolus imeshika nafasi ya kwanza katika Manispaa ya Singida, huku shule ya Senge Sekondari ikishika nafasi ya kwanza kati ya shule za serikali. Mwankonko Sekondari imekuwa ya pili, wakati shule ya Mufumbu imekuwa ya mwisho.

Ufaulu huu umeonyesha mafanikio makubwa katika sekta ya elimu katika Manispaa ya Singida, na inategemewa kuwa jitihada za kuboresha viwango vya elimu zitaendelea kuongeza mafanikio zaidi kwa mwaka 2025.