UFAULU WAPANDA MKOA WA SINGIDA

Posted on: April 9th, 2024

MKOA wa Singida umepongezwa kutokana na ufaulu katika shule zake za msingi na sekondari kwa mwaka 2023 ambao umepanda tofauti na mwaka 2022.

Ufaulu huo umepanda, kidato cha nne kwa asilimia 88.15 na awali ulikuwa 86.14 huku darasa la saba wao wakiwa na asilimia 80.3.

Pongezi hiyo zimetolewa na Afisa Elimu Mkoa wa Singida, Dkt Elipidius Baganda jana, Aprili 8, 2024, katika Kikao kazi cha Tathmini ya Mitihani ya Taifa ya Darasa la Saba, Kidato cha Nne, Kidato ch Sita na Upimaji wa Darasa la Nne na Kidato cha Pili.

 Baganda alisema ufaulu kwa Mkoa wa Singida umepanda kwa mwaka jana, lakini bidii zinatakiwa kuonekana kwa mwaka huu, ilikuwa juu zaidi.

“Kwa mwaka 2023, Mkoa wa Singida umepanda kwenye ufaulu wake kwa kila mahali, darasa la saba, kidato cha pili, cha nne cha sita kote tumepanda na hii ni katika kujituma na kujiamini, ingawa tunatakiwa kuweka bidii na kufanya vizuri zaidi tena mwaka huu.”

Licha ya mafanikio hayo, Baganda amewaelekeza walimu kuhakikisha shule zao zinafanya vizuri kwenye upimaji wa darasa la nne na kidato cha pili na sita wanafaulu kwa asilimia 100, huku kidato cha nne kuanzia asilimia 50 na darasa la saba ufaulu wao kwa asilimia 85, ilikuhakikisha Mkoa wa Singida unafanya vizuri na unakuwa katika nafasi nzuri.