"UMUHIMU WA MFUMO BORA WA USALAMA WA AFYA KAZINI"

Posted on: April 28th, 2025

Waziri wa Nchi Ofisi ya Waziri Mkuu , Kazi, Vijana ,Ajira na Wenye ulemavu , Ridhiwan Kikwete amesema Serikali inatambua umuhimu wa kuwa na mfumo bora wa usalama wa afya katika shughuli za uzalishaji hapa nchini.

Waziri Kikwete amesema hayo leo 28 Aprili, 2025 wakati akifunga maonesho ya 21 ya kimataifa ya wiki ya usalama na afya mahala pa kazi- OSHA yaliyofanyika Mkoani Singida katika viwanja vya Maonesho Manispaa ya Singida.

Amesema Rais wa Jamhuri ya Muungano wa Tanzania Dkt. Samia Suluhu Hassan amekuwa mstari wa mbele kuhakikisha nguvu kazi inalindwa kwa kuendelea kuimarisha Taasisi ya Usalama na Afya Mahala pa kazi kwa kuiwezesha vitendea kazi na rasilimali watu ili kurahisisha utendaji kazi wake.

“ ninachowaomba tumieni vifaa hivi na rasilimali watu mliyonayo kuhakikisha afya na usalama mahala pa kazi vinaimarika”, amesema Kikwete.

Waziri Kikwete pia amesisitiza juu ya umuhimu wa kuzingatia kauli mbiu isemayo “Nafasi ya akili mnemba na teknolojia ya kidigitali katika kimarisha usalama wa afya mahala pa kazi” na kusema kauli hiyo inaangaza mchango wa technolojia mpya mbalimbali zinazotumika katika uzalishaji na utoaji huduma ili kuleta mapinduzi na uboreshaji wa afya na usalama mahala pa kazi.

Aidha Kikwete amewataka wadau na waajiri kuangalia mbinu bora ya kutumia akili mnemba ili kupunguza vihatarishi kwa wafanyakazi mahala pa kazi pamoja na kutambua na kushughulikia changamoto kabla ya kuleta madhara kwa wafanyakazi.

Naye Mkuu wa Mkoa wa Singida Halima Dendego, ameipongeza Taasisi ya OSHA kwa kutoa huduma za fya bure kwa wakazi wa Singida mbali na maonesho mbalimbali yanayozingatia afya na usalama mahala pa kazi.

“…wananchi wamekuja kujifunza kupitia maonesho hayo lakini pia wamepata fursa ya matibabu… hii haijawahi kutokea”, amesema Dendego.

RC Dendego ameonesha kuridhishwana namna ujumbe wa mwaka huu wa matumizi ya akili mnemba ulivyotekelezwa kwa vitedo katika maonesho hayo na kusema huo ni mchango mkubwa ambao Taasisi ya OSHA imetoa katika kujali afya na usalama wa watenda kazi mahala pa kazi