UN WOMEN YAWAJENGEA UWEZO WANAWAKE VIONGOZI MANISPAA YA SINGIDA

Posted on: November 13th, 2024

Shirika la Kimataifa la UN Women limeendesha mafunzo maalum ya uongozi kwa wanawake viongozi, lengo likiwa ni kuwajengea uwezo wanawake kuwa viongozi bora katika jamii, kuendelea kushiriki katika nyanja za uongozi, na kupinga ukatili dhidi yao.

Mafunzo hayo yamefanyika leo, Novemba 13, 2024, yamewakutanisha wanawake kutoka Halmashauri ya Manispaa ya Singida na Halmashauri ya Mkalama, pamoja na wawakilishi wa watu wenye ulemavu.

Washiriki zaidi ya 100 walihudhuria mafunzo hayo, ambapo waliwezeshwa katika mada tatu kuu: Mafunzo ya Uongozi, Masuala ya Kijinsia, na Fursa za Kiuchumi kwa Wanawake.

Wanawake waliohudhuria ni viongozi kutoka Kata za Mandewa na Majengo za Manispaa ya Singida, na kutoka Kata za Ibaga na Tunguli za Halmashauri ya Mkalama.

Mgeni rasmi katika ufunguzi wa mafunzo hayo, Patrick Kasango, ambaye ni Afisa Maendeleo Mwandamizi wa Mkoa wa Singida, alisema kuwa lengo la mradi huu ni kuzalisha viongozi bora wa kike katika kipindi cha miaka mitano ijayo, akitoa mifano ya viongozi wa wanawake wa Tanzania akiwemo Rais Samia Suluhu Hassan, Spika Dr. Tulia Ackson, na Meya wa Manispaa ya Singida, Yagi Kiaratu.

"Dhamira ya serikali ni kumkomboa mwanamke kiuchumi, ndiyo maana kuna fursa kama hizi za mikopo ya vikundi vya wanawake."

Kasango aliongeza kuwa mafunzo hayo yatasaidia wanawake kupiga vita ukatili dhidi yao katika jamii, hasa wanapokuwa viongozi.

"Mafunzo haya yatakuwa na manufaa makubwa katika kusaidia wanawake kupambana na ukatili, kwani kama mtakuwa viongozi, mtakuwa na sauti kubwa ya kuleta mabadiliko," alisema.

UN Women imekuwa ikiendesha miradi mbalimbali yenye lengo la kumkomboa mwanamke kiuchumi, kiuongozi, na kupinga ukatili dhidi ya wanawake. Miradi hii ni sehemu ya juhudi za kuleta mabadiliko chanya katika jamii na kuhakikisha usawa wa kijinsia katika maeneo mbalimbali.