“USIKUBALI MAMA NA MTOTO APATE CHANGAMOTO MIKONONI MWAKO!” — DKT. FATUMA MGANGA

Posted on: November 13th, 2025

Katibu Tawala wa Mkoa wa Singida, Dkt. Fatuma Mganga, amewataka viongozi wa afya kuongeza uwajibikaji katika kupunguza vifo vya akina mama na watoto wachanga, akisisitiza matumizi sahihi ya rasilimali zilizotolewa na Serikali ya Awamu ya Sita.

Amesema Serikali imewekeza kwenye miundombinu, vifaa tiba na dawa, hivyo ni muhimu huduma ziboreshwe ili kuokoa maisha ya wananchi. Dkt. Mganga amesisitiza kuwa rasilimali zilizopo zitumike kwa tija kwa manufaa ya Watanzania wote.

Amepongeza mafanikio ya upatikanaji wa damu salama kwa zaidi ya asilimia 100, akisisitiza kuwa hatua hiyo inapaswa kutumika kuokoa maisha ya mama na mtoto bila kupoteza hata mmoja.

Dkt. Mganga pia amehimiza elimu kutolewa kwa jamii nzima kuhusu afya ya uzazi hata kabla ya ujauzito, ili kuzuia vifo vinavyotokana na kukosa uelewa. Ameitaka jamii kutumia vituo vya afya vilivyo karibu wakati wa dharura.

Kwa upande wake, Mganga Mkuu wa Mkoa, Dkt. Victorina Ludovick, amesema akina mama 13 walipoteza maisha katika robo ya Julai–Septemba kutokana na changamoto mbalimbali, ikiwemo kutokwa na damu na matatizo ya upumuaji kwa watoto.

Viongozi wa afya mkoani Singida wameahidi kuongeza ushirikiano, kuboresha rufaa, na kuhakikisha dawa na huduma muhimu zinapatikana muda wote ili kupunguza kwa kiwango kikubwa vifo vya mama na mtoto.