UVCCM TAIFA WAHIMIZA UTEKELEZAJI WA ILANI KWENYE NYANJA ZOTE KATIKA MANISPAA YA SINGIDA

Posted on: December 20th, 2022

 Umoja wa Vijana  wa Chama Cha Mapinduzi Taifa (VCCM) umeipongeza Serikali ya Mkoa wa Singida, kwa kusimamia vyema mkoa huu hasa katika kubuni miradi mbalimbali ya maendeleo na hasa miradi ya vijana

Katika ziara yake kwenye mkoa wa singida Mwenyekiti wa UVCCM Taifa Mohammed Kawaida ambaye aliongozana na Makamu wake Bi. Rehema Sombi Pamoja na wajumbe wengnine wa Chama,pamoja na masuala mengine wamehimiza suala la utunzaji mazingira kwa kupanda miti eneo la hospitali ya Rufaa ya Mkoa wa Singida.

Mwenyekiti huyo amesema, Serikali chini ya Rais wa Jamhuri ya Muungano wa Tanzania, Dkt. Samia Suluhu Hassan, imetoa fedha kwa ajili ya kuongeza majengo ya kutolea huduma za afya katika Hospitali hiyo ya Rufaa na kutoa rai kwa wasimamizi na watendaji katika hospitali hiyo kuhakikisha wanazitumia kwa umakini kulingangana na maelekezo ili  kukamilisha mradi huo.

Aidha Kawaida, amewapongeza  wauguzi wa hospitali ya Rufaa ya Mkoa wa Singida kwa huduma nzuri wanayoitoa kwa wagonjwa  na kusema kuwa kazi ya uuguzi ni wito na inahitaji kujitoa kwa hali na mali.

“Afya ni wito. Tunawashukuru sana wauguzi wetu kwa kujitoa nguvu kazi zenu katika kusaidia Maisha ya watu wengine,…….,” amesema Kawaida

Makamu M/Kiti wa UVCCM Taifa,  Bi. Rehema Sombi ambaye pia ni mbobezi wa Afya ya Jamii , amesisitiza kuwa wao kama vijana jukumu lao kubwa ni kusikia, kuona, kunusa na kuhakikisha ILANI ya Chama Cha Mapinduzi inatekelezwa katika Nyanja zote ikiwamo Afya.

“Hospital hii ndipo nilipofanya mafunzo yangu ya vitendo nilipokuwa mwaka wa pili Chuo Kikuu…….., Najivunia sana leo hii na mimi kuwa sehemu ya Mafanikio ya Hospitali hii. Tunaijenga nchi kwa Pamoja”. Amesema Sombi.

Akisoma taarifa fupi ya maendeleo ya hospitali ya Rufaa, Mganga Mfawidhi wa hospitali hiyo, Bi. Fatma Sita, amesema kuwa hospitali hiyo ina idadi ya madaktari bingwa 13,  Madaktari watatu (3) wa Program ya Mama na Mtoto, na Watumishi 376 sawa na 48% ya mahitaji huku upungufu ukiwa ni 57%. Amefafanua kuwa jumla ya watumishi 57 katika hospitali hiyo wanalipwa kwa mapato ya ndani ya Hospitali .

“Moja kati ya Mafanikio tunayojivunia katika hospitali yetu ni Pamoja na basi la watumishi, kulipa stahiki za watumishi wote. Hatuna mtumishi anayedai mshahara kwa sasa. Nikiri tu ya kwamba, Sera ya Wizara ya Afya inayosimamiwa na CCM inatoa huduma bora kwa Mama Wajawazito”. Amesema Sita.

Ugeni huu wa UVCCM ngazi ya taifa ulipata fursa pia ya kutembelea miradi ya vijana iliyonufaika kwa fedha za maendeleo za 10% ya mapato ya ndani ya Manispaa kikiwamo kikundi cha vijana cha Chipukizi katika Kata ya Mitunduruni.

Mstahiki Meya Manispaa ya Singida Yagi Kiaratu,aliyeambatana na ugeni huo  amesifu Sera Mpya ya Serikali ya Mikopo ya 10% ya Mapato ya ndani ya Halmashauri kwenda kwa vijana kwa ajili ya kujikwamua kiuchumi, na kutoa rai kwa maafisa maendeleo ya Jamii, kuendelea kuwaelimisha vijana kuhusu  fursa zinazotolewa na Serikali ili kuweza kujikwamua kiuchumi na kukuza pato la nchi.

“Mama na Serikali yake wamejipanga vizuri. Mngekuja Singida miaka mitano nyuma, maendeleo haya tuliyofikia hayakuwepo. Tunaishukuru Sera Mpya ya 10% Mapato ya ndani kutoka kwenye mfuko wa Waziri Mkuu umepelekwa kwa vijana kwa ajili ya kujikwamua kiuchumi. Ambapo 4% inaenda kwa vijana, 4% kwa Wanawake na 2% kwa Walemavu”. Amesema Kiaratu

Katika ziara hiyo ya siku moja katika Manispaa ya Singida, UVCCM wameshiriki katika zoezi zima la upandaji miti katika maeneo ya Hospitali ya Rufaa, kutembelea miradi mbalimbali katika Manispaa ya Singida ukiwemo mradi wa kikundi cha mafundi Seremala kiitwacho CHIPUKIZI, Mitunduruni, Pamoja na mradi wa Ufugaji Nyuki, Kisaki, na kutoa zawadi kwa Kina Mama Waliojifungua katika hospitali ya Rufaa.