VIJANA MANISPAA YA SINGIDA WAHAMASISHWA KUJITOLEA KUCHANGIA DAMU KUOKOA MAISHA

Posted on: December 22nd, 2024

Vijana katika Manispaa ya Singida wameaswa kujenga tabia ya kujitoa kwa ajili ya wengine walio wahitaji, ikiwemo kuchangia damu salama ili kuokoa maisha.

Mwenyekiti wa Umoja wa Vijana wa Chama cha Mapinduzi (UVCCM) wilaya ya Singida Mjini, Mohamed Msaghaa, alikiri umuhimu wa zoezi hili, ambalo lilofanyika jana Desemba 22, 2024, katika Mtaa wa Soko, Kata ya Ipembe.

Zoezi hili lilikuwa ni la uchangiaji damu salama, ambapo Msaghaa aliongozana na mjumbe wa Kamati ya Siasa wa wilaya ya Singida Mjini, Ramadhani Mtipa.

Msaghaa alisema kuwa, zoezi hili lilihusisha vijana zaidi ya 100, ambao walichangia damu huku pia wakipata fursa ya kubadilishana mawazo na kufurahia burudani ya nyama choma na vinywaji baridi.

Aliongeza kuwa, ingawa zoezi hili liliwavutia zaidi vijana, lengo lake halikuwa kumtenga mtu yoyote bali kuokoa maisha ya watu wengine.

"Tunaomba vijana waendelee kujitolea kwa moyo mmoja katika shughuli kama hizi. Zoezi hili limekuwa na manufaa makubwa kwa jamii yetu," alisisitiza Msaghaa.

Aidha, Msaghaa alitaja taasisi na wadau mbalimbali walioshirikiana ili kuhakikisha zoezi hili linafanikiwa, akiwemo Laka Fashions wauzaji wa nguo mjini Singida, JAI Foundation, TTCL, Singida Charity, na Hospitali ya Manispaa.

Kwa upande wake, Mganga Mkuu wa Manispaa ya Singida, Dkt. Anwar Milulu, alieleza kuwa jumla ya chupa 40 za damu zilichangiwa katika zoezi hilo na kuishukuru jamii kwa ushirikiano mkubwa.

Milulu alisisitiza umuhimu wa vijana na jamii kwa ujumla kujenga tabia ya kujitolea kwa ajili ya wenzao, hasa katika shughuli zinazosaidia kuokoa maisha.

Zoezi hili ni sehemu ya juhudi za kuhamasisha jamii kujitolea na kuendelea kuwa na moyo wa kusaidiana katika kuokoa maisha ya wengine.