VIJANA WATAKIWA KUCHANGAMKIA FURSA KUPITIA UFUGAJI WA NYUKI

Posted on: May 21st, 2023

Serikali imewataka vijana kuchangamkia fursa zinazotokana na ufugaji wa nyuki ili kujikwamua kiuchumi na kuliongezea taifa pato kupitia sekta hiyo adhimu.

Waziri wa Maliasili na Utalii, Mohamed Mchengerwa, aliyasema hayo leo tarehe 21 Mei 2023 wakati akimuwakilisha Dkt. Philip Isidor Mpango, Makamu wa Rais wa Jamuhuri ya Muungano wa Tanzania katika maadhimisho ya Siku ya Nyuki Duniani ambayo kitaifa yamefanyika katika Mkoa wa Singida.

Mchengerwa amesema, vijana wanapaswa kutumia fursa hizo kupitia Wizara ya Maliasili na Utalii ambayo ina mifuko mbalimbali kwa ajili ya kuendeleza sekta ya nyuki na misitu kwa ujumla.

Amewataka vijana hao kusimamia kauli ya Mkoa wa Singida isemayo “ACHIA SHOKA KAMATA MZINGA”, inayohimiza uhifadhi wa misitu kwa kufuga nyuki ambao kupitia mazao yao, vijana hao wataweza kujikwamua kiuchumi.

Aidha Waziri Mchengerwa ameagiza Wakala wa huduma za misitu nchini (TFS) kutenga baadhi ya misitu itakayotumika kama mashamba darasa kwa wafugaji nyuki lakini pia kama sehemu ya utalii kwa watalii wa ndani na nje ya nchi.

Waziri huyo ametoa agizo pia kwa Wizara ya Maliasili na Utalii na Taasisi zake, kuandaa mpango mkakati ambao utawezesha uzalishaji wa asali kuongezeka kutoka tani 31,000 kwa sasa na kufikia tani 138,000 kwa mwaka.

“Naagiza Wizara na Taasisi zake zote kuandaa mpango mkakati utakaowezesha kuongezeka kwa uzalishaji wa asali…niupate ndani ya miezi miwili kutoka leo”, ameagiza Mchengerwa.

Akiongea kabla ya mgeni rasmi kuhutubia wananchi, Mkuu wa Wilaya ya Ikungi, Thomas Apson, ambae amemuwakilisha Mkuu wa Mkoa wa Singida Peter Serukamba, amesema kwa kipindi cha miaka mitano wafugaji wa nyuki katika Mkoa wa Singida wameongezeka kutoka 5675 kwa 2017/2018 na kufikia wafugaji 12,133 mwaka 2021/2022 sawa na asilimia 113.8.

Amesema ongezeko hilo la wafugalij wa nyuki limewezesha Mkoa kuingiza zaidi ya shilingi bilioni 1 kwa kipindi cha miaka mitano zilizotokana na mazao ya nyuki.

Kaimu Mkuu huyo wa Mkoa amesema pia Mkoa umeweza kuhifadhi zaidi ya hekta 400,000 za misitu ya asili pamoja na vichaka vya Itigi vyenye zaidi hekta 61,000 ambavyo ni uoto adimu duniani vyenye kutoa asali bora duniani.

Maadhimisho ya Siku ya Nyuki Duniani yameadhimishwa Mkoani Singida katika Manispaa ya Singida na kuhudhuriwa na viongozi wa chama na serikali, taasisi mbalimbali za umma na binafsi na wananchi kwa ujumla kutoka mikoa mbalimbali.