VIKUNDI VYA WANAWAKE VYAPATIWA MAFUNZO

Posted on: December 4th, 2025

Shirika lisilo la kiserikali la UN Women kwa kushirikiana na Halmashauri ya Manispaa ya Singida imeendesha mafunzo kwa kwa vikundi vya wanawake wenye ulemavu na wasio na ulemavu kuhusu usimamizi wa vicoba, uundaji na usajili wa vikundi vinavyoomba zabuni ya 30% kuputia mfumo wa NeST na uundaji wa vikundi kwa ajili ya mkopo wa 10%.

Akifungua mafunzo hayo Kaimu Mkurugenzi wa Manispaa Edward Mboya, amewataka washiriki kufuatilia kwa umakini mafunzo hayo ili wakawe mabalozi wazuri kwa vikundi vingine vya wanawake ili kuepuka upotevu wa fedha lakini pia kuvifanya vikundi hivyo kuwa bora.

Nae mkuu wa Divisheni ya Maendeleo ya jamii, Upendo Naftali, amevitaka vikundi vyote vya wanawake vinavyojishughulisha na kuweka na kukopa fedha, kuhakikisha wanasajili vikundi hivyo kwani ni takwa la kisheria kwa mujibu wa taratibu na miongozo ya Benki Kuu.

Jumla ya washiriki 100 wakiwemo maafisa Maendeleo ya jamii ngazi ya kata 22 , wanavikundi 60 kutoka katika vikundi 20 vya wanawake na wataalam ngazi ya halmashauri wameweza kupatiwa mafunzo hayo yaliyofanyika kwa siku mbili katika ukumbi wa Manispaa ya Singida.