VIONGOZI NA WATAALAMU SINGIDA WATAKIWA KUWAFIKIA WANANCHI KUSIKILIZA KERO ZINAZOWAKABILI.

Posted on: July 5th, 2022

SERIKALI mkoani Singida, leo tarehe 5 Julai ,2022 imeagiza viongozi, wataalamu na watendaji wa taasisi za umma, kuhakikisha wanafanya ziara katika ngazi za kata, Vijiji na mitaa ili kuwafikia wananchi na kusikiliza kero walizonazo na kuzitatua.

Mkuu wa mkoa wa Singida Dk.Binilith Mahenge amesema hayo, kupitia kikao na viongozi hao alichoitisha baada ya kumaliza ziara katika Halmashauri 7 za mkoa wa Singida ambapo alifanya  mikutano ya hadhara mahususi kwa ajili ya kusikiliza kero za wananchi.

Pamoja na kutoa agizo hilo, Dk.Mahenge, alipongeza juhudi zinazofanywa na Wakuu wa wilaya katika mkoa wake za kutembelea miradi ya Maendeleo na kuzungumza na wananchi na kuwataka kuendeleza juhudi hizo ili kutatua kero za wananchi.

“unaweza kufanya kazi kubwa ya Maendeleo lakini kumbe kero inayomkabili mwananchi ni ndogo sana ya kueleweshwa tu lakini kwa kuwa hakusikilizwa ikaharibu mazuri yote yaliyofanywa” alisema Mkuu wa Mkoa.

Hata hivyo Dr. Mahenge alipongeza  halmashauri zote katika suala zima la  ukusanyaji wa mapato, na kuitaka wilaya ya  Manyoni katika Halmashauri zake mbili za manyoni na Itigi kuongeza kasi ili kuuwezesha mkoa huo kufikia malengo ya serikali kupitia fedha za makusanyo ndani katika mwaka wa fedha 2022/2023.

Aidha Dr. Mahenge alitolea mfano wa kazi nzuri ya ukusanyaji mapato iliyofanywa na Manispaa ya Singida katika kituo kikuu cha mabasi yaedayo mikoani na kusema kuwa usimamizi mzuri wenye tija umewezesha ongezeko la mapato ya ndani katika Manispaa mwaka wa fedha 2021/2022.

 Pamoja nayo Mkuu wa mkoa alitaja kero ya migogoro ya ardhi kuwa ni tatizo sugu miongoni mwa wananchi wa Singida na kuwataka Wakuu wa wilaya pamoja na idara za ardhi katika Halmashauri zao kukaa pamoja na kutatua kero hizo ikiwa ni pamoja na kuanzisha benki ya takwimu ya kero zilizoshughulikiwa ili kuwa na kumbukumbu sahihi kwa siku zijazo.

“ suala la ardhi ni very delicate hivyo kuwepo kwa  kumbukumbu za hatua zilizochukuliwa kutatuweka mahali salama zaidi katika siku zijazo” alisisitiza.

Kikao hicho cha majumuisho kilihudhuriwa na wakuu wa wilaya,  wajumbe wa kamati ya ulinzi na usalama Mkoa, Wakurugenzi wa Halmashauri 7 za mkoa wa Singida  na wakuu wa idara katika Halmashauri hizo.