VIONGOZI WA DINI WILAYA YA SINGIDA WASISITIZA UMUHIMU WA AMANI KABLA YA UCHAGUZI

Posted on: October 27th, 2025

VIONGOZI WA DINI WILAYA YA SINGIDA WASISITIZA UMUHIMU WA AMANI KABLA YA UCHAGUZI

Viongozi wa dini mbalimbali Wilaya ya Singida wamewataka wananchi kuendelea kuiombea amani ya Tanzania na kuhakikisha utulivu unadumishwa katika kipindi chote cha Uchaguzi Mkuu, wakisisitiza kuwa kudumisha amani ni jukumu la kila raia.

Wakizungumza katika kikao maalum cha viongozi wa dini na Kamati ya Usalama kilichofanyika leo, Oktoba 27, 2025, katika Ofisi ya Mkuu wa Wilaya ya Singida, viongozi hao walifanya dua maalum kuombea uchaguzi uwe wa amani na haki, huku wakihamasisha wakazi wa wilaya hiyo kujitokeza kwa wingi kupiga kura Oktoba 29, wakisema ni haki yao ya msingi.

Akizungumza katika kikao hicho, Mkuu wa Wilaya ya Singida, Mhe. Godwin Gondwe, aliwapongeza viongozi wa dini kwa mchango wao mkubwa katika kudumisha amani na mshikamano miongoni mwa wananchi, akibainisha kuwa maombi yao yamechangia kwa kiasi kikubwa kuhakikisha wilaya hiyo inaendelea kuwa salama na tulivu bila viashiria vya uvunjifu wa amani.