VIONGOZI WATAKIWA KUTENDA HAKI

Posted on: February 3rd, 2025

Kaimu Katibu Tawala wa Mkoa wa Singida, Bw. Romward Mwendi, amewasisitiza viongozi kutoa haki kwa kuzingatia misingi ya sheria wakati wa Kilele cha Maadhimisho ya Siku ya Sheria Nchini yaliyofanyika leo katika Mahakama ya Hakimu Mkazi, Manispaa ya Singida.

Bw. Mwendi alisisitiza umuhimu wa kuhakikisha haki inatolewa kwa wananchi wote, kuanzia ngazi za chini, na kwamba utawala wa sheria ni nguzo muhimu katika ufanisi wa jamii. Alitoa wito kwa viongozi kuhakikisha wanatoa haki bila upendeleo, akieleza kuwa haki iliyotolewa kwa usawa ni msingi wa amani, usalama, na utulivu katika jamii.

"Toeni haki pasipo upendeleo. Mnapotoa haki kuna matunda yanapatikana, tunda la amani, usalama na utulivu. Wale ambao wanasimamia vyombo vya sheria wakiwa na dhamira ya kweli ya kutenda haki, basi mambo yatakuwa sawa," alisema Bw. Mwendi.

Dhima kuu ya maadhimisho haya ni "Tanzania ya 2050: Nafasi ya Taasisi Zinazosimamia Hali ya Madai katika Kufikia Malengo." Mwendi alieleza kuwa, ili kufikia malengo haya, ni muhimu kwa taasisi zinazohusika na masuala ya sheria kuhakikisha zinatoa huduma bora kwa wananchi, na kuwa sehemu muhimu ya maendeleo ya taifa.