WAGANGA WAKUU WA MIKOA NA WILAYA WATAKIWA KUFANYA UFUATILIAJI WA UTOAJI HUDUMA VITUONI KUBAINI CHANGAMOTO

Posted on: December 13th, 2023

SERIKALI imewataka waganga wakuu wa mikoa na wilaya kuhakikisha wanafanya ufuatiliaji wa mara kwa mara katika vituo vya  kutolea huduma za afya ili kubaini changamoto zinazowakabili wananchi pamoja na watoa huduma katika vituo vya afya na zahanati

Waziri Ofisi ya Rais Tawala za mikoa na Serikali za Mitaa (TAMISEMI) Mohamed Mchengelwa (Mb) ametoa agizo hilo leo Desemba 13, 2023 wakati akikabidhi magari 06 aina ya Toyota Landcruiser yaliyotolewa kwa ajili ya shughuli za ufuatiliaji katika sekta ya afya kwa mganga mkuu wa Mkoa wa Singida na waganga wakuu wa wilaya 5 za Iramba, Mkalama, Halmashauri ya Wilaya ya Singida, Ikungi na Manyoni katika hafla fupi iliyofanyika katika ofisi ya mkuu wa Mkoa wa Singida.

Mchengerwa amesema, serikali imetoa magari hayo ili waganga wakuu waweze kufanya ufuatiliaji katika vituo vya kutolea huduma na kufanya vikao na watumishi katika vituo hivyo mara kwa mara ili kuweza  kubaini changamoto zinazowakabili watumishi katika utendaji wao wa kazi vituoni pamoja na wananchi na kuzitatua kwa wakati.

“ Lengo ni kuimarisha huduma bora kwa jamii. Na hii inawezekana kwa kila kitu kufanyika kwa ufasaha, tumepewa nyenzo, vyeo, mishahara kwan nini tushindwe”, amesema Mchengerwa.

Waziri Mchengerwa amesema taarifa za utekelezaji wa vikao vya waganga wakuu na watumishi katika vituo vya kutolea huduma ziwasilishwe TAMISEMI kwa hatua zaidi.

Aidha amempongeza Mkuu wa Mkoa wa Singida Peter Serukamba kwa umahiri katika utendaji kazi  na kusema pongezi hizo pia ziwafikie wakuu wa mikoa wote ambao wameonesha uwajibikaji  wa kiwango cha juu katika kusimamia miradi na kusikiliza changamoto za wananchi.

Amesema kutokana na uongozi imara wa Mkuu wa Mkoa wa Singida  Peter Serukamba na Katibu Tawala Dkt. Fatuma Mganga, hategemei  takwimu za ubora za mkoa wa Singida zishuke, na kwamba ni wakati sasa kwa wakuu wa mikoa, wilaya na wakurugenzi kuelewa vyema maeneo ya kazi na kusimamia kwa ufasaha .

Hata hivyo, Ili kongeza ufanisi katika utoaji wa huduma, Waziri Mohamed Mchengerwa amesema tayari TAMISEMI imeomba vibali vya ajira vya nyongeza kwa watumishi wa sekta ya afya na elimu ambapo zaidi ya ajira mpya 24,000 zinatarajiwa kutolewa.