WAKURUGENZI WA HALMASHAURI ZA MKOA WA SINGIDA WAPEWA SIKU 2 KUHAKIKISHA VIBAO VYA ANWANI ZA TAASISI VINASIMIKWA

Posted on: April 27th, 2022

Katibu Tawala Mkoa wa Singida Bi. Doroth Mwaluko amezitaka taasisi zote za umma mkoani Singida kuhakikisha wameweka vibao vya anwani zakutambulisha taasisi zao ifikapo tarehe 29.04.2022.

Bi. Doroth amesema itakuwa aibu kwa taasisi za umma kushindwa kuweka kibao cha anwani yake mpaka ifikapo tarehe hiyo na kumwagiza Meneja wa Posta kuhakikisha anazifuatilia taasisi zote za umma kuhakikisha wameweka vibao vya kutambulisha taasisi zao.

Katibu Tawala wa Mkoa aliyasema hayo katika kikao cha pamoja na Naibu Katibu Mkuu wa wizara ya Habari, Mawasiliano na Teknolojia ya Habari Ndg. Mohamed Hamis Abdula aliyetembelea Mkoa wa Singida kujionea shughuli za utekelezaji wa zoezi la anwani za makazi.

Akiongea na Wakurugenzi wa Halmashauri 7 za mkoa wa Singida, Naibu katibu Mkuu amewataka kuhakikisha zoezi la usajili wa anwani za makazi linakamilika kwa ufanisi ifikapo tarehe 05 Mei, 2022

Agizo hilo limetolewa baada ya kutembelea Chuo cha Ufundi Stadi (VETA) Singida na kujioneka shughuli ya utengenezaji wa vibao vya mitaa, barabara, taasisi na nguzo kwa ajili ya Manispaa ya Singida vinavyoendelea kutengenezwa.

Naibu Katibu Mkuu amesema anaamini muda uliotolewa Halmashauri zote 7 zitakuwa zimefikia lengo kusudiwa na kuongeza kuwa kukamilika kwa zoezi la anwani za makazi kutapelekea zoezi la sensa ya watu na makazi kutekelezwa kwa urahisi na ufasaha Agosti 2022.

“Kushindwa kwenu kukamilisha zoezi la anwani za makazi kutasababisha zoezi la sensa ya watu na makazi kuwa gumu” alisema Naibu Katibu Mkuu.

Akiwasilisha taarifa ya utekelezaji wa zoezi la anwani za makazi Mratibu wa Manispaa ya Singida Ndg. Aristedius Mulokozi aliesema tayari Manispaa ya singida imeshachukuwa hatua mbalimbali ikiwa ni pamoja na kugawa kazi kwa wazabuni wawili ambao ni Chuo cha Ufundi VETA wanaotengeneza vibao 1983 na vibao 410 vinatengenezwa na Ofisi binafsi ya ufundi stadi ya SARAFINA.

Mulokozi amesema wadau mbalimbali katika Manispaa ya Singida pamoja na wananchi wamehamasishwa na kushirikishwa kupitia vikao ili kuchangia utengenezaji wa nguzo kwa kushirikiana na Manispaa.

Mkuu wa chuo cha VETA Singida Ndg. Paul Batoliki  akitoa ufafanuzi kuhusu shughuli nzima ya utengenezaji wa vibao vya mitaa, barabara na taasisi kwa ajili ya Manispaa ya Singida

Kazi ya utengenezaji kabali za nguzo na vibao katika karakana ya chuo cha VETA Singida. Jumla ya vibao 1983 vinatengenezwa katika karakana hiyo.