WALENGWA 1,546 KUNUFAIKA NA MRADI WA KIZAZI HODARI - MANISPAA YA SINGIDA

Posted on: November 22nd, 2022

Manispaa ya Singida ni miongoni mwa Halmashauri 26 zinazotatarajia kutekeleza mradi wa Kizazi Hodari wenye lengo la kuimarisha afya, ustawi na ulinzi kwa Watoto wanaoishi katika mazingira hatarishi (WWKMH) na vijana umri 0-17 ili kufikia malengo ya dunia ya kupambana na VVU kwa asilimia 95%-95%-95% (UNAIDS goals)

Akitabulisha mradi katika kikao kilichujumuisha wadau mbalimbali katika Manispaa ya Singida Meneja Mradi  wa Kanda ya Kati, Issa Murshid, amesema mradi huu unatarajiwa kunufaisha walengwa wapatao 1,546 katika Manispaa ya Singida nakuongeza kuwa  utatekelezwa katika Mikoa 7 na Halmashauri 26.

Aidha amefafanua kuwa mradi huo utaratibiwa katika kanda 2 ambazo ni kanda ya Kati makao makuu yakiwa Dodoma na Kanda ya Kaskazini makao makuu yakiwa Arusha na utatekelezwa kwa kipindi cha miaka 5 kuanzia April 2022 hadi Machi 2027

Ameitaja mikoa ya utekelezaji kuwa ni Arusha, Kilimanjaro, Tanga, Manyara, Singida, Dodoma na Morogoro. Aidha kwa mkoa wa Singida Halmashauri nne zitakazotekeleza mradi huu ambazo ni Halmashauri ya Manispaa ya Singida, Halmashauri za wilaya za Ikungi, Iramba na Manyoni.

Murshid ameyataja malengo mahususi ya mradi kuwa ni pamoja na kuimarisha afya, ustawi na ulinzi kwa Watoto waishio katika mazingira magumu (WWKMH) na vijana balehe katika jamii zenye kiwango cha juu cha maambukizi ya VVU pia  kuongezeka kwa matumizi ya majukwaa/fursa ya kutambua mashauri ya VVU kwa WWKMH pamoja na kuunganisha huduma za upimaji na matibabu ili kufubaza VVU

Amelitaja lengo la tatu kuwa ni kuongeza upatikanaji wa huduma za kuzuia VVU, kuzuia na kukabiliana na ukatili kwa Watoto waishio katika mazingira magumu na vijana              

Kwa mujibu wa Afisa Ruzuku  na Fedha za Kizazi Hodari Makao makuu ya KKKT  Arusha, Bi. Jane Malisa, mradi huu utakaotekelezwa katika mikoa 7 utagharimu kiasi cha dola za kimarekani zipatazo milioni 27 na unafadhiliwa  Shirika la maendeleo ya kimataifa la Marekani (USAID) huku Mtekelezaji Mkuu akiwa Kanisa la Kiinjili la Kiluteri Tanzania.

Akifungua mkutano huo wa utambulisho wa mradi kwa wadau na wataalamu wa Manispaa ya Singida, Kaimu Katibu Tawala Mkoa Beatus Choaji, amepongeza mradi huo na kuwataka watekelezaji kuhakikisha wanaelimisha wadau kwa ufasaha na kuondoa mashaka yanayoweza kujitokeza ili kutoa nafasi kwa mradi kutekelezwa kwa ufanisi.

“maswali yaliyoibuka kuhusiana na suala zima la utekelezwaji wa mradi yatolewe ufafanuzi kwa ufasaha, na kuwashirikisha wataalamu ngazi ya mkoa/halmashauri ili kueleweka vyema kwa wadau na hasa wanufaika”, amesema Choaji.

Kwa Mkoa wa Singida jumla ya walengwa 7,014 wanatarajiwa kunufaika na mradi huo utakaotekelezwa kwa miaka 5.