WALIMU NA WAZAZI WATAKIWA KUPANDA MBEGU BORA KWA WANAFUNZI ILI WAPENDE SHULE

Posted on: May 10th, 2025

Walimu na wazazi wametakiwa kupanda mbegu bora kwa watoto wao ili kuwawezesha kupenda shule na kudhibiti utoro  shuleni, mimba za utotoni, na hivyo kuzuia mdondoko wa wa elimu kwa kuwa na mahudhurio mazuri shuleni.

Wito huo umetolewa na Mkurugenzi wa Manispaa ya Singida, Joanfaith Kataraia, leo 10 Mei, 2025 katka kongamano la wadau wa elimu lililofanyika katika ukumbi wa chuo cha uhasibu Singida ambapo wadau walipata nafasi ya kubaini changamoto na kushauri namna bora ya kuzitatua lakini pia kupongeza mafanikio yaliyopatikana katika elimu.

Mkurugenzi Kataraia alichukuwa nafasi hiyo pia kuwapongeza wadau kwa kujitokeza kwa wingi katika kongamano hilo ambapo waliweza kushauri namna bora ya kuinua kiwango cha elimu katika Manispaa ya Singida.

Amesema kazi ya kuboresha elimu siyo ya serikali peke yake bali ni jukumu la kila mtu kwa nafasi yake, na kuwataka wadau hao kutoa ushauri wenye kujenga utakaotoa mwelekeo katika kuinua elimu ndani ya Manispaa ya Singida na pia mkoa wa Singida.

Kuhusu suala la kuzuia mdondoko wa elimu, Kataraia amesema ipo haja ya walimu na wazazi/walezi kupanda mbegu bora kwa watoto ili kuwafanya kupenda shule na masomo wanayofundishwa.

“….tupande mbegu bora kwa watoto zitakazo wafanya kupenda shule na hivyo kuzuia utoro, mimba za utotoni na mengine membi ambayo yanamfanya mtoto kuchukia shule”, ameasa Kataraia.

Aidha Mkurugenzi huyo ametumia fursa hiyo kuwataka walimu kusimamia na kutunza miundombinu ya kufundishia na kujifunzia iliyojengwa kwa gharama ili iweze kutumika na kizazi cha sasa na hata kizazi kijacho.

Pamoja na hayo ameutaka uongozi wa shule kufanya vikao  na wazazi  ili kuwaelimisha juu ya suala zima la elimu bure lakini pia kusisitiza umuhimu wa kuchangia chakula kwa wanafunzi wawapo shuleni.

Akizungumzia suala la ulinzi kwa watoto, Mkurugenzi Kataraia amewataka wadau hao wa elimu kuunga mkono juhudi za serikali katika kuzuia ukatili kwa watoto, ndoa za utotoni, mimba katika umri mdogo haliitakayowafanya  watoto kuwa na utulivu ili kuwawezesha kutimiza ndoto zao.

“fanyeni vikao vitakavyo wawezesha kukumbushana wajibu wa kumlinda mtoto  na pia jukumula kuwajengea watoto misingi mizuri na bora ya maelezi” amesisitiza.

Kataraia pia amewataka viongozi wa dini kuwakumbusha wazazi kujenga ukaribu na watoto wao ili kubaini changamoto wanazokutana nazo na kuzitatua mapema ili kuepusha madhara kwa watoto hao.

Amesema , watoto wanakutana na changamoto mbalimbali na ngumu, hivyo ni jukumu la wazazi kuwaweka watoto karibu nao ili kuweza kuzibaini  kwa upole na kuzitatua kabla ya kuleta madhara kwa watoto hao.

“viongozi wa dini muwapo katika nyumba za ibada, endeleeni kuwakumbusha wazazi umuhimu wa kuwa karibu na watoto wao ili kubaini changamoto zinazo wakabili tena kwa upole na kuzitatua.  ….watoto wanakutana na changamoto nyingi na nyingine ni ngumu sana wanahitaji ukaribu wa wazazi” amesisitiza

Amesema wazazi wanapaswa watambue kuwa hakuna urithi uliobora kwa watoto  kama elimu hivyo pamoja na majukumu mengine , wasisahau jukumu la malezi kwa watoto hao kwa kuwapa misingi iliyobora ambayo hawataicha hata wanapokua.

Kongamano hilo la wadau lilijumuisha viongozi viongozi mbalimbali wakiwemo viongozi wa dini, waheshimiwa madiwani, walimu wakuu na wakuu wa shule, maafisa elimu wa kata, viongozi ngazi ya vijiji , mitaa na kata, viongozi wa kimila, wafanya biashara na taasisi mbalimbali.