WALIMU WAPONGEZWA KWA UFAULU, WASISITIZWA KUSHIRIKI UCHAGUZI WA SERIKALI ZA MITAA

Posted on: November 23rd, 2024

Walimu wa Wilaya ya Singida wamepongezwa na Mkuu wa Mkoa wa Singida, Mhe. Halima Dendego, kutokana na ongezeko la ufaulu wa wanafunzi, huku akiwataka kushiriki kwa wingi katika Uchaguzi wa Serikali za Mitaa utakaofanyika Novemba 27, 2024.

Mhe. Dendego alitoa pongezi hizo leo Novemba, 23, 2024 wakati wa Bonanza la Mwalimu na Samia, lililofanyika kwa ajili ya Walimu wa Wilaya ya Singida, ( Manispaa na Singida DC) katika Uwanja wa Bombadia, Manispaa ya Singida.

. Bonanza hilo lilikuwa na lengo la kumpongeza mwalimu kwa juhudi zake katika kuboresha elimu na kuhamasisha ushiriki wa wananchi katika uchaguzi wa Serikali za Mitaa.

Katika hotuba yake Mhe. Dendego alieleza kuridhishwa kwake na kazi nzuri inayofanywa na walimu katika Mkoa wa Singida hususan wilaya ya Singida.

"Natambua kazi mnayofanya walimu tangu nimefika hapa Mkoa wa Singida. Walimu mmekuwa baraka, sio kwamba nawapamba hapana, kwani mimi ni muumini wa takwimu. Tangu nimeingia, takwimu zenu zinasoma kwenda juu na sio chini. Ndiyo maana mkiniita mara moja, nimekuwa nikiitika sababu mnanifurahisha, mnafanya kazi zenu kwa ueledi na uzalendo,".

Aidha, Mhe. Dendego aliwakumbusha walimu umuhimu wa kushiriki katika Uchaguzi wa Serikali za Mitaa utakaofanyika tarehe 27 Novemba 2024. "Naomba niwakumbushe kuwa tarehe 27 Novemba, mwaka huu ni siku ya kupiga kura. Uchaguzi wa Serikali za Mitaa, twende tukachague viongozi wetu bora wa mitaa yetu," alisisitiza.