WANACHAMA WA SIMBA WACHANGIA DAMU CHUPA 25 ZAHANATI YA ITITI, WAPONGEZWA

Posted on: August 3rd, 2024

Wanachama wa Klabu ya Simba, Tawi la Ititi, Kata ya Uhamaka, wamejitokeza kwa wingi kuchangia damu katika Zahanati ya Ititi, katika tukio la kijamii lililofanyika leo Agosti 3, 2024, ikiwa ni sehemu ya maadhimisho ya Simba Day. Siku hiyo maalum ya Simba Day huadhimishwa kila mwaka na klabu hiyo kwa kufanya shughuli mbalimbali za kijamii na kutambulisha wachezaji wapya kwa ajili ya msimu mpya wa ligi.

Katika zoezi hilo, wanachama wa Simba kutoka Tawi la Ititi walifanikiwa kuchangia jumla ya chupa 25 za damu. Zoezi hilo la kuchangia damu salama lilisimamiwa na Mganga Mfawidhi wa Zahanati ya Ititi, Dkt. Aminiel Elisamson, kwa ushirikiano na watumishi wa zahanati hiyo pamoja na Mratibu wa Damu Salama wa Manispaa ya Singida, Eliasifiwe Yunami, na Mkuu wa Kitengo cha Maabara, Razack Mustapha.

Dkt. Elisamson aliwashukuru wanachama wa Simba kwa moyo wao wa kujitolea, akisisitiza kuwa damu hiyo itakuwa na manufaa makubwa kwa wagonjwa wenye uhitaji katika Manispaa ya Singida. "Chupa hizi 25 za damu zitasaidia sana kwa wagonjwa mbalimbali, hasa mama wajawazito, waathirika wa ajali, na wagonjwa wengine wenye uhitaji wa damu," alisema Dkt. Elisamson.

Simba Day ni tukio muhimu kwa klabu ya Simba, ambapo wanachama na mashabiki wa klabu hiyo hushiriki katika shughuli za kijamii ili kuonyesha mshikamano wao na jamii zinazowazunguka. Maadhimisho ya mwaka huu yameonesha upendo na kujitoa kwa wanachama wa klabu hiyo, huku wakionyesha mfano mzuri wa jinsi michezo inavyoweza kuleta mabadiliko chanya katika jamii.