WANANCHI WA SINGIDA WAZINDUA MAADHIMISHO YA MIAKA 63 YA UHURU KWA KUTEMBELEA WAGONJWA, UPANDAJI MITI NA BURUDANI HOSPITALI YA RUFAA YA MKOA

Posted on: December 9th, 2024

Wananchi wa Mkoa wa Singida, wakiongozwa na Mkuu wa Mkoa,Mhe. Halima Dendego, leo wameadhimisha miaka 63 ya Uhuru wa Tanzania Bara kwa kusherehekea katika Hospitali ya Rufaa ya Mkoa wa Singida, Mandewa.

 Sherehe hizo zimejumuisha shughuli mbalimbali ikiwa ni pamoja na kuwatembelea wagonjwa hospitalini, zoezi la upandaji miti, burudani kutoka kwa vikundi vya sanaa, na zawadi ya keki kwa wagonjwa.

Katika maadhimisho hayo, shampeni zilifunguliwa kama ishara ya upendo na mshikamano kwa wananchi na wafanyakazi wa hospitali

Mhe. Dendego aliongoza hafla hiyo huku akiwa na viongozi wengine wa serikali pamoja na Kamati ya Ulinzi na Usalama. Aidha, viongozi kutoka Chama cha Mapinduzi (CCM) wakiwemo Mwenyekiti wa CCM Mkoa, Martha Mlata, na kamati yake ya siasa, walihudhuria sherehe hizo. Viongozi kutoka CHAUMA, Machifu wakiwemo Chifu Senge Ndovu Mughenyi, pamoja na viongozi wa dini na wananchi kutoka maeneo mbalimbali ya Mkoa wa Singida walishiriki katika maadhimisho hayo.

Katika kuadhimisha miaka 63 ya Uhuru ilikuwa pamoja na kutekeleza mikakati ya kulinda mazingira, zoezi la upandaji miti lilifanyika kwa lengo la kuboresha mandhari ya hospitali, kukabiliana na mabadiliko ya tabia nchi, na kuongeza lishe kwa jamii ya hospitali na wananchi kwa ujumla.

 Hadi sasa, jumla ya miti 1,768,192 imepandwa katika maeneo mbalimbali ya mkoa, ikiwa ni pamoja na miti 5,450 iliyopandwa jana Disemba 8, 2024. Miti hiyo inajumlisha miche ya matunda, miti ya vivuli, na miti ya mbao.

Mhe. Dendego alieleza kuwa zoezi la upandaji miti ni zawadi kwa wananchi wa Mandewa na jamii ya hospitali, kwani itasaidia kuboresha mazingira kwa kutoa vivuli, maeneo ya kupumzikia kwa watoa huduma, na hewa safi kwa wagonjwa.

Dendego alisisitiza kuwa miti hiyo itakuwa na manufaa kwa kizazi cha sasa na kijacho.

“Tukasema ni zawadi gani ya kudumu tupeleke Mandewa, kwa kuwa eneo la Mandewa liko wazi. Tuweke miti hii kama zawadi ya kudumu. Miti hii itakuwa vivuli, itakuwa maeneo ya kupumzikia kwa watoa huduma na kwa wagonjwa pia kupata hewa safi. Tumepanda miti 501 kama zawadi. Tunaomba zawadi hii muipokee, wanamandewa,” alisema Dendego katika hotuba yake.

Maadhimisho hayo ya Uhuru yameonesha umoja na mshikamano wa wananchi wa Mkoa wa Singida katika kusherehekea historia ya taifa na pia kuendelea na juhudi za kulinda na kuboresha mazingira.