WANANCHI WA WILAYA YA SINGIDA WAUNGANA NA VIONGOZI MBALIMBALI KUSHEHEREKEA MAADHIMISHO YA MIAKA 60 YA MUUNGANO

Posted on: April 25th, 2024

Wananchi wa Wilaya ya Singida wamesherehekea maadhimisho ya miaka 60 ya Muungano wa Tanganyika na Zanzibar huku wakiungana na viongozi mbalimbali wa serikali,chama, dini na viongozi wa kimila.

Maadhimisho hayo yaliyofanyika katika Uwanja wa Stendi ya Zamani, Manispaa ya Singida, yalichukuwa sura ya kipekee kutokana na wingi wa wananchi waliojitokeza pamoja na viongozi mbalimbali ambao licha ya rasharasha za mvua zilizokuwa zikinyesha, walionekana kuwa na furaha na bashasha katika kusherehekea Miaka 60 ya Muungano

Mkuu wa Mkoa wa Singida Halima Dendego, ambaye alikuwa Mgeni Rasmi katika maadhimisho hayo, amewaasa wananchi wa Singida kushirikiana katika kusukuma gurudumu la maendeleo mbele na kutokukubali kuyumbishwa na yeyote ili kukatisha ndoto zao za kimaendeleo.

Amesema, amani na utulivu uliopo, maendeleo, umoja na mshikamano ni matunda ya Muungano hivyo wanasingida wana kila sababu ya kuulinda ili kufikia malengo ya maendeleo kiuchumi kama mkoa lakini kwa mtu mmoja mmoja.

Viongozi mbalimbali walioungana na mkuu wa mkoa katika mkesha wa maadhimisho ya miaka 60 ya muungano ni pamoja na Katibu Tawala Mkoa wa Singida, Dkt. Fatma Mganga, Mbunge wa jimbo la Singida Mjini Mussa Sima, Mkuu wa Wilaya ya Singida, Godwin Gondwe na Katibu Tawala wa Wilaya ya Singida Naima Chondo.

Wengine ni Madiwani wa halmashauri zote mbili za Wilaya ya Singida, Kamati za Siasa za Halmashauri zote mbili, Viongozi wa Dini na Kimila, Kamati ya Usalama wilaya, wakuu wa Idara na Vitengo, watumishi wa halmashauri zote mbili na wananchi kwa ujumla.