WARATIBU WA MREJESHO NA HABARI WA HALMASHAURI ZA MKOA WA SINGIDA WAPATIWA MAFUNZO

Posted on: December 11th, 2024

Katika kuhakikisha wananchi wanapata huduma bora zinazotolewa na Serikali, Ofisi ya Rais Utumishi na Utawala Bora imetoa mafunzo maalum kwa Maafisa Mrejesho na Maafisa Habari wa Halmashauri saba za Mkoa wa Singida.

Mafunzo hayo, ambayo yameanza leo, Desemba 11, 2024, katika Ukumbi mdogo wa Ofisi ya Mkuu wa Mkoa wa Singida, yanalenga kutoa elimu kwa umma kuhusu matumizi ya mfumo wa mrejesho na muongozo wa kushughulikia mrejesho wa wananchi kuhusiana na huduma zinazotolewa na Serikali.

Akizungumza wakati wa ufunguzi wa mafunzo hayo, Afisa Utumishi Mwandamizi wa Ofisi ya Rais - Utumishi na Utawala Bora, Hassan Kilenza, alisisitiza kuwa lengo la mfumo wa E.Mrejesho ni kuhakikisha wananchi wanapata huduma bora kutoka kwa Serikali bila kuwa na malalamiko yoyote.

“Lengo letu ni kuwawezesha wananchi kupata huduma bora na kujua ni wapi wanapaswa kutoa mrejesho kuhusu huduma wanazopata, ili tuweze kuboresha na kutoa huduma bora kila wakati,” alisema Kilenza.

Aidha, mafunzo hayo ni umuhimu mkubwa kwa Maafisa Mrejesho, kwani watapata ujuzi wa kuwasaidia wananchi kutatua changamoto zao na kupokea huduma bora kutoka kwa Serikali bila vikwazo.

Mafunzo hayo, ambayo yatadumu kwa siku tatu, yanatarajiwa kuwa na manufaa makubwa kwa maafisa na wananchi kwa ujumla, huku wakitarajiwa kuongeza ufanisi katika utoaji wa huduma za Serikali katika maeneo yao.