WATAALAM MANISPAA YA SINGIDA WATAKIWA KUONGEZA JUHUDI KWENYE MAPATO

Posted on: November 14th, 2024

Wataalam kutoka Halmashauri ya Manispaa ya Singida wametakiwa kuendelea kuongeza juhudi katika ukusanyaji wa mapato, huku wakiendelea kusisitizwa kutoa hamasa na kushiriki kikamilifu katika Uchaguzi wa Serikali za Mitaa utakaofanyika Novemba 27, 2024.

Hayo yamesemwa na Meya wa Manispaa ya Singida, Mhe. Yagi Kiaratu, wakati wa Mkutano wa Pili wa Baraza la Madiwani kwa Robo ya Kwanza ya mwaka wa fedha 2024/25.

Meya Kiaratu alieleza kuwa, licha ya mafanikio yaliyopatikana katika ukusanyaji wa mapato kwa kiwango cha asilimia 25 katika robo hii ya kwanza, hali ya mapato huenda kushuka katika kipindi kijacho.

“Katika robo hii ya kwanza, tumekusanya mapato kwa asilimia 25, lakini tunapoelekea, mapato yatashuka kutokana na kipindi tunachokaribia. Hivyo ni muhimu kuongeza nguvu katika vyanzo vyetu vya mapato ili tuweze kukabiliana na changamoto hiyo. Kuna vyanzo fulani ambavyo viko hatarini kutokana na sheria zetu, lakini vile ambavyo tunaweza kuongeza bidii, basi nguvu iongezeke,” alisema Meya Kiaratu.

Katika hatua nyingine, Meya Kiaratu alitoa pongezi kwa madiwani, wataalam na wananchi kwa ushirikiano wa hali ya juu katika zoezi la uandikishaji katika daftari la Serikali za Mitaa. Alisisitiza kuwa hatua za awali za zoezi hilo zimedhihirisha ushirikiano mzuri, na kuwa sasa jukumu ni kuhakikisha wananchi wanashiriki kwa wingi katika uchaguzi wa Serikali za Mitaa unaotarajiwa kufanyika mwishoni mwa mwezi Novemba.

“Hatua za awali tumeenda vizuri kwa kushirikiana, lakini sasa jukumu letu ni uchaguzi. Hivyo, tuendelee kushirikiana na kutoa hamasa kwa wananchi kuhakikisha wanashiriki kikamilifu katika Uchaguzi wa Serikali za Mitaa, Novemba 27, 2024,” alisisitiza Meya Kiaratu.