WATENDAJI KATA NA WATAALAMU WA AFYA, WANUFAIKA NA ELIMU YA MFUMO WA MANUNUZI KWA KIELEKTRONIKI

Posted on: January 16th, 2025

Mamlaka ya Udhibiti wa Ununuzi wa Umma nchini (PPRA), imewaagiza watumishi wa Umma, katika Halmashauri ya Manispaa ya Singida, kuanzia ngazi ya msingi, kutimiza lengo la Serikali, la kuhakikisha kila mmoja anatumia mfumo wa manunuzi, unaotumia njia ya Kielektroniki.

Agizo hilo limetolewa Leo 16 Jnarari, 2025, na Afisa Manunuzi Kanda ya Kati na Magharibi, Anna Bulele, wakati anaendesha mafunzo, kwa watumishi wa Umma, wakiwemo Wataalamu Sekta ya afya ngazi ya zahanati, vituo vya afya na Maafisa Watendaji wa Kata,mitaa na vijiji wa Halmashauri ya Manispaa ya Singida. 

Mafunzo hayo yalihusu matumizi ya Mfumo wa Ununuzi kwa njia ya Kielektroniki (NEST), uliotengenezwa na Mamlaka ya Udhibiti wa Ununuzi wa Umma, kwa lengo la kuleta tija zaidi kwa Serikali, na kuweza kukusanya na kudhibiti upotevu wa mapato ya Umma, kupitia mfumo huo. 

Kwa mujibu wa Bulele, makao makuu ya Kanda ya Kati na Magharibi, yapo jijini Dodoma, na kanda hii inaundwa na mikoa ya Singida, Dodoma, Tabora na Kigoma.

Bulele amesema kuwa, licha ya NEST kusaidia Serikali kukusanya fedha kupitia kodi, pia mfumo huo unakuwa na wigo mpana wa kupata wanunuzi, kutokana na kusambaa kwa haraka, hali inayochangia idadi kubwa ya watu kuweza kuomba zabuni mbalimbali zinazotangazwa, kwa njia ya mtandao.

“Katika mfumo huu, kila kinachofanyika, kipo kwenye hali ya ubora wa juu sana, pia mfumo unatoa wigo mpana, kwa watu kuomba zabuni na uwazi unakuwepo,kwa kila anayeomba…Seikali inapunguza matumizi ya fedha yasiyo ya lazima, kutokana na ushindani, wa wanunuzi,” alisema Bulele .

Kwa upande wake Afisa Manunuzi, Manispaa ya Singida, Asha Mansour, ameishukuru Serikali kuweza kuendesha mafunzo ya NEST, kwa Halmashauri hiyo, akiamini yataleta mabadiliko chanya, miongoni mwa watumishi wa Umma, na hivyo kurahisisha utendaji kazi wa mazoea.

Amesema kuwa, sasa kila mtumishi ataepuka na tabia ya kutaka kununua mahitaji ya ofisi yake bila kufuata utaratibu wa manunuzi, na ameahidi kuwatembelea watumishi hao mara kwa mara, kubaini wale walioitika na kufuata maelekezo sahihi, juu ya matumizi ya mfumo wa NEST.

“Tutafanya utaratibu mzuri wa kufika huko waliko, kubaini kwamba wanaufuata mfumo vizuri walivyofundishwa, ili kuepukana na changamoto za hoja na kutoka nje ya utaratibu…ifike hatua sasa kwa afisa manunuzi kufanya wajibu wake,”alisema Asha.

Mafunzo hayo, tayari yamenufaisha kada mbalimbali, ikiwemo ile ya elimu, (Walimu wakuu wa shule za msingi na Sekondari), Waganga wafawidhi wa Zahanati, Vituo vya Afya, Hospitali, Watendaji Kata, Mitaa na vijiji, huku taratibu zikiendelea kwa Wakuu wa Idara, ili nao wapatiwe Mafunzo hayo.

Pichani ni mmoja wa washiriki wa mafunzo akiuliza swali kuhusiana na mfumo wa manunuzi wa kielektroniki (NeST)

Afisa Manunuzi wa Kanda ya Magharibi Bi. Anna Bulele akifafanua jambo wakati wa mafunzo ya utumiaji wa mfumo wa manunuzi kielektroniki Manispaa ya Singida