WATENDAJI NGAZI YA KATA WAJENGEWA UWEZO WA KIUTENDAJI ILI KURAHISISHA UTEKELEZAJI WA MAJUKUMU

Posted on: June 7th, 2022

Watumishi katika ngazi ya kata na mitaa waaswa kushirikiana katika kutekeleza majukumu yao ili kufanikisha azma ya kuleta Maendeleo kwa Jamii wanayoiongoza.

Hayo yameelezwa leo tarehe 07 Juni, 2022 na Diwani wa Kata ya Unyianga Mhe. Geofrey Mdama wakati akifungua kikao kazi cha Watumishi wa Serikali katika kata (3) za Unyianga, Mtamaa na Mwankoko Manispaa ya Singida kilicholenga katika kuhimiza uwajibikaji kwa watumishi wa umma.

Mhe. Mdama amesema Utumishi ni wito hivyo kuwataka watumishi hao kutekeleza majukumu yao pasipo migongano ili lengo la wito wao kutimia. Aidha amewataka kuzingatia mafundisho na maelekezo watakayopatiwa katika kikao kazi hicho kilichoongozwa na Kaimu Mkurugenzi wa Manispaa Ndg. Kulanga Matia Kayanga pamoja na timu ya menejimenti ya Manispaa ya Singida.

“sisi kama Serikali tumewapa dhamana kubwa watumishi na ndiyo maana ninasema dhamana hiyo ni wito…..” amesema Mhe. Mdama

Akiongea na Watumishi baada ya kikao kazi kufunguliwa Kaimu Mkurugenzi wa Manispaa Ndg. Kulanga M. Kayanga amesema lengo la kikao hicho ni kukumbusha Watumishi juu ya majukumu na wajibu wa kiutumishi pamoja na kuhimiza ushirikiano baina ya Watumishi katika ngazi ya Kata ili kila mmoja afikie lengo katika kutekeleza majukumu yake.

Amesema Watumishi katika kila sekta hutegemeana katika kutekeleza majukumu yao kiutumishi hivyo hawanabudi kuwa wamoja katika kila hatua hasa ya usimamizi wa miradi, ukusanyaji mapato na usimamizi wa sheria mbalimbali.

“Ni wajibu wa Mtendaji wa kata kutembelea shule, zahanati, vikundi vya Vijana, Wanawake na watu wenye ulemavu, vikundi vya kilimo na ufugaji ili kubaini mapungufu na kushirikiana na watumishi katika sekta hizo kupata ufumbuzi na sio kumwachia mwenye sekta peke yake” amesisitiza Kaimu Mkurugenzi ambaye pia ni Afisa Utumishi wa Manispaa ya Singida.

Pamoja na masuala mbalimbali ya kiutendaji Kaimu Mkurugenzi ametumia fursa hii kupitia timu ya menejimenti  kuwajengea uwezo watumishi hao kuhusiana na masuala mbalimbali ya kiutumishi, kuhamasisha shughuli za vikundi na Mikopo ya Vijana Wanawake na watu wenye ulemavu, Sensa ya watu na makazi, anwani za makazi, Afya na Elimu.

Ziara hii ni moja ya mikakati ya Manispaa ya Singida katika kuwajengea uwezo Watumishi wake pia kubaini changamoto wanazokutana nazo katika utekelezaji wa kila siku wa majukumu yao. Aidha mkakati huu hutoa nafasi kwa watumishi katika ngazi za kata, Vijiji na mitaa kushauri na kutoa maoni yao kwa uongozi hali inayorahisisha utatuzi wa changamoto mbalimbali na kuboresha mazingira ya utendaji kazi.

Jumla ya Watumishi 40 wa kata za Mwankoko, Unyianga na Mtamaa wamejengewa uwezo wa kuimarisha utendaji kazi kwa kusimamia sheria, taratibu na kanuni za kiutumishi pia kujenga ushirikiano baina yao na jamii.