WATENDAJI WA KATA, WAKUU WA SHULE NA WALIMU WAKUU, WATAKIWA KUSIMAMIA MAPATO KATIKA MAENEO YAO

Posted on: February 6th, 2023

Manispaa ya Singida, imewataka Watendaji wa Kata kusimamia mapato katika kata zao sambamba na walimu wa shule za msingi na sekondari zenye vibanda vya biashara, ili kurahisisha utekelezaji wa miradi ya maendeleo, katika Halmashauri hiyo.

Kaimu Mkurugenzi wa Manispaa ya Singida, Jeshi Lupembe, amesema hayo kwenye kikao baina yake na Watendaji wa Kata, Walimu wakuu na maafisa elimu wa kata, kwa lengo la kuhimiza usimamizi wa mapato.

Alisema kuwa, Halmashauri imefanya shughuli mbalimbali za maendeleo katika mwaka wa fedha 2022/2023, kupitia fedha za makusanyo ya ndani, hivyo ili iweze kukamilika hadi ifikapo juni 2023, zinahitajika juhudi zaidi.

Hata hivyo Lupembe, amewataka Watendaji hao kuhakikisha wanaishauri vyema Ofisi ya Mkurugenzi, hasa kwenye suala zima la utoaji taarifa zinazohusu makusanyo ya mapato na usimamizi wa miradi yote.

“ Manispaa ina dhamira ya dhati ya kuwaletea Wananchi wake maendeleo hivyo tunahitaji fedha zaidi ili kutekeleza hayo…sasa ni wakati wa kujituma katika kukusanya mapato kwa ajili ya Manispaa yetu”, alisema Lupembe.

 Aidha amehimiza suala la makusanyo ya ada za taka na akaagiza zoezi hilo liende sambamba na utoaji elimu kwa jamii, ili ione umuhimu wa kulipa kwa wakati, na mapato yake yaweze kumarisha usafi ndani ya mji.