WATOTO WENYE MAHITAJI WAPATIWA MSAADA WA VIFAA VYA SHULE

Posted on: August 28th, 2024

Shirika lisilo la kiserikali la The Community Impact Organization (CIO), kwa kushirikiana na Ofisi ya Mkurugenzi wa Manispaa ya Singida, limegawa vifaa vya shule kwa watoto wenye mahitaji maalum na wanaoishi katika mazingira magumu.

Msaada huo umelenga kuhakikisha watoto hao wanapata elimu bila vikwazo, huku wazazi na walezi wakiwa na jukumu la kufuatilia maendeleo yao.

Zoezi la ugawaji wa vifaa lilifanyika katika Shule ya Msingi Nyerere na liliongozwa na Mkurugenzi mwenza wa Shirika la CIO, Salome Kyombo, ambaye pia ni Afisa Elimu wa Kata ya Mughanga. Vifaa vilivyotolewa ni pamoja na sare za shule, mashati, bukta, sketi, sweta, madaftari, na peni kwa watoto 46 waliohitaji msaada.

Kyombo alisema, “Niwaombe wazazi waone umuhimu wa kufuatilia maendeleo ya watoto wao. Tumeweza kutoa msaada huu kwa sehemu, lakini bado kuna mahitaji mengi kama chakula na vitu vingine. Tunahitaji sapoti kutoka kwa wadau ili kuweza kusaidia zaidi.”

Afisa Elimu Watu Wazima kutoka Ofisi ya Mkurugenzi wa Manispaa ya Singida, Shehe Khoja, alitoa shukrani kwa shirika hilo na kusema, “Tunashukuru shirika hili kwa msaada wao. Tunawaomba wadau wengine waendelee kujitokeza ili kusaidia kwa vitu vingine kama chakula na viatu.”

Kwa upande Afisa Ustawi wa Manispaa, Dorah Saimon alisema, “Tunawashukuru sana Shirika la CIO kwa kutambua watoto hawa kutoka katika mazingira hatarishi na kuwasaidia. Wazazi wanapaswa kuhakikisha wanafuatilia maendeleo ya watoto wao ili kila kitu kiende sawa.”

Mzazi mmoja wa watoto waliopokea msaada, Bi. Rehema Elisha, alieleza, “Nawashukuru shirika kwa msaada huu. Sisi kama wazazi tutahakikisha watoto wetu wanapata elimu na tunafuatilia maendeleo yao kwa karibu.”