WAZAZI MANISPAA YA SINGIDA WAPONGEZWA KWA MCHANGO WA CHAKULA MASHULENI

Posted on: May 28th, 2025

WAZAZI na walezi wa wanafunzi wa shule za msingi na sekondari katika Manispaa ya Singida wamepongezwa kwa juhudi zao za kuunga mkono utoaji wa chakula mashuleni, hatua inayochangia kwa kiasi kikubwa maendeleo ya kitaaluma kwa wanafunzi.

Pongezi hizo zimetolewa leo Mei 28, 2025 na Mkuu wa Wilaya ya Singida, Mheshimiwa Godwin Gondwe, wakati wa kikao cha tathmini ya lishe kwa robo ya tatu (Januari hadi Machi) kwa mwaka wa fedha 2024/25, kilichofanyika katika Ukumbi wa Chuo cha Afya, Manispaa ya Singida.

Akizungumza katika kikao hicho kilichowakutanisha Watendaji wa Kata na wataalamu mbalimbali wa sekta ya lishe na elimu, Mhe. Gondwe alisema juhudi za wazazi kuchangia chakula mashuleni zimekuwa na mchango mkubwa katika kuhakikisha watoto wanapata fursa ya kujifunza wakiwa katika mazingira rafiki na yenye tija.

"Nawapongeza wazazi kwa namna wanavyoendelea kushirikiana na Serikali kuhakikisha watoto wetu wanapata mlo shuleni." alisema Mhe. Gondwe.

Kwa mujibu wa takwimu zilizowasilishwa katika kikao hicho, kwa sasa asilimia 78.2 ya wanafunzi katika shule za msingi na sekondari za Manispaa ya Singida wanapata chakula shuleni, huku jitihada zikiendelea kufanyika kufikia asilimia 100 ya ulishaji mashuleni.

Mkuu huyo wa wilaya alisisitiza kuwa Serikali itaendelea kushirikiana na wadau wote wa elimu na lishe kuhakikisha suala hilo linaimarika zaidi. Alitoa wito kwa wazazi na walezi kuendelea na moyo huo wa kujitolea ili kuhakikisha kila mwanafunzi anapata lishe bora na ya kutosha akiwa shuleni.

Kikao hicho ni sehemu ya mikakati ya halmashauri kuhakikisha utekelezaji wa afua za lishe unafuatiliwa kikamilifu, na kuwahamasisha wadau kuchukua hatua stahiki katika kupambana na utapiamlo miongoni mwa watoto wa umri wa shule.