WAZAZI WAASWA KUZUNGUMZA KWA UPOLE NA WATOTO ILI KUBAINI CHANGAMOTO ZINAZOWAKABILI

Posted on: March 5th, 2023

Wazazi mkoni Singida wameaswa kutumia lugha laini na ya upole pindi watoto wanapohitaji ushauri wao ili kubaini changamoto mbalimbali zinazowakabili na kuzitafutia ufumbuzi.

Katibu Tawala Mkoa wa Singida, Mwalimu Dorothy Mwaluko, ametoa wito huoleo tarehe 5 Machi, 2023 katika mdahalo ulioandaliwa na Shule ya Sekondari ya Wasichana Tumaini,iliyoko Kinampanda wilayani Iramba, uliohusu mtoto wa kike katika ulimwengu wa kidigitali.

Mwl. Mwaluko amesema, kulingana na utandawazi ni vyema wazazi na hasa kina mama kutumia muda mwingi kusema na watoto wao ili kubaini changamoto wanazokutana nazo na kuchukua hatua mara moja ya namna bora ya kukabiliana nazo.

“ utandawazi ni mzuri lakini unachangamoto katika malezi na makuzi ya watoto…..kinamama tumieni lugha ya upole ili muweze kubaini yanayowasibu watoto na kutafuta ufumbuzi”, amesisitiza Mwaluko.

Katika mdahalo huo uliongozwa na Mwl. Mwaluko akiwa mwenyekiti, mada mbalimbali ziliwasilishwa kumhusu mtoto kike katika ulimwengu wa kidigitali, ambazo ni Mila na Desturi, Uhuru wa kutoa maoni, haki ya kupata elimu, Ulimwengu wa kidigitali, unyanyaswaji wa mwanamke  na mavazi yenye staha.

Wanafunzi hao walipata nafasi ya kujadili mada hizo na mapendekezo kutolewa ikiwa ni pamoja na jamii kuelimishwa kuhusu haki za mabinti / watoto wakike, Kukomeshwa kwa vitendo vya unyayasaji wa wanawake na watoto wa kike, Elimu juu ya haki za wanawake hasa vijijini ambapo ilielezwa kuwa wanawake wengi hushindwa kujieleza kuhusu changamoto zinazowakabili.

Mapendekezo mengine yaliyotolewa na mabinti hao ni suala la usiri katika dawati la jinsia kupewa kipaumbele ili kuepuka kuwadhoofisha wahanga, kutokomezwa kwa ndoa za utotoni na kutolewa kwa elimu ya kujiendeleza kwa mabinti ambao wamekomea elimu ya darasa la saba kutokana na umri wao kuwa bado mdogo.

Pamoja na Mdahalo huo wanafunzi wa shule ya Tumaini waleweza pia kuonesha ubunifu wao katika suala la mafazi ya asili ambayo yalimfurahisha mwenyekiti wa mdahalo huo na kuahidi kuandaa tamasha la mavazi ya asili yenye staha kwa watoto wa kike katika shule za msingi na sekondari Mkoani Singida.

Naye Katibu wa Chama Cha Walimu Mkoa, Bi. Digna Nyaki amesema Mdhahalo huo umekuja wakati mwafaka kwani teknolojia imekuwa ikitumiwa tofauti na malengo kusudiwa na hivyo kuwaharibu vijana wa kike na wa kiume.

Bi. Nyaki amewaasa mabinti hao kelewa wajibu wao na kuheshimu mila na desturi za jamii zinazomlinda mtoto wa kike ili kumwezesha kuwa mama na kiongozi bora hapo baadae.

Mdahalo uliofanyika ni katika mwendelezo wa wiki ya maadhimisho ya  Siku ya Wanawake Duniani ambapo kilele cha maadhimisho hayo ni tarehe 08/03/2023 kauli mbiu ikiwa Ubunifu wa Mabadiliko ya Teknolojia: Chachu katika kuleta Usawa wa Kijinsia