ZAIDI YA BILIONI 17 ZA TUMIKA KUBORESHA MIUNDOMBINU YA SHULE MANISPAA YA SINGIDA

Posted on: May 10th, 2025

Halmashauri ya Manispaa ya Singida kwa kipindi cha 2022/2023 hadi Machi 2024/2025 imepokea zaidi ya Tshs. Bilioni 17 kwa ajili ya kuboresha miundombinu ya kujifunzia na kufundishia kwa shule za msingi na sekondari.

Afisa Elimu Sekondari wa Manispaa ya Singida Athuman Mnyusi, ameeleza hayo leo 10 Mei 2025 katika taarifa aliyoisoma mbele ya wadau wa elimu katika Kongamano la wadau wa elimu lililofanyika katika Ukumbi wa chuo cha Uhasibu Singida.

Katika taarifa yake iliyoelezea Mafanikio katika sekta ya elimu, changamoto, na mikakati ya kuboresha elimu, Mnyusi amesema Halmashauri ya Manispaa ya Singida na wananchi kwa ujumla wanamshukuru Rais wa Jamhuri ya Muungano wa Tanzania, Dkt. Samia Suluhu Hassan, kwa kuwezesha fedha nyingi kwa ajili ya kuboresha miundombinu ya kutolea elimu na hivyo kuwa na mazingira mazuri ya kisasa ya kujifunzia na kufundishia

“……tunamshukuru kwa dhati Rais wa Jamhuri ya Muungano wa Tanzania Dkt. Samia Suluhu Hassan kwa mafanikio makubwa katika sekta ya elimu…tuna deni kubwa kwake”, ameeleza Mnyusi.

Naye Naibu Meya wa Manispaa ya Singida Alhaj Gwae Mbua amepongeza wadau wa elimu kwa kushiriki kongamano hilo na kushauri kufanyiwa kazi kwa changamoto zilizotolewa ili utekeleza wa shughuli za uboreshaji elimu ziweze kufanyika kwa asilimia 100.

Naibu Meya ametumia nafasi hiyo pia kuhimiza suala la uchangiaji chakula ili watoto waweze kupata  mlo  wa mchana shuleni hali itakayowapa utulivu wa kufuatilia masomo

Ameshauri kutungwa kwa sheria ndogo itakayowajibisha wazazi wote kuchangia chakula kwani kinyume cha hapo utoro na mahudhurio duni yataendelea na hivyo kusababisha mdondoko wa elimu katika Manispaa ya Singida.

Akiwasilisha salamu za Mbunge wa Jimbo la Singida Mjini, diwani wa kata ya Kisaki, Moses Ikaku ametoa Pongezi kwa Mheshimiwa Rais kwa kutoa fedha kwa ajili ya ujenzi wa shule ya Amali katika Manispaa ya Singida ikiwa ni jitihada zake katika kukabiliana na changamoto ya ajira kwa vijana wanaomaliza kidato cha nne, sita na hata vyuo.

Ameiasa jamii kutumia vyema fursa hiyo kwa kuwapeleka watoto wao kupata ujuzi katika shule hiyo ili waweze kujiajiri na kupata kipato pia kukuza uchumi wa taifa.

Wadau mbalimbali wameshiriki kongamano hilo wakiwemo waheshimiwa madiwani wa halmashauri ya manispaa ya Singida, Viongozi wa Dini, walimu wakuu na wakuu wa shule, maafisa elimu Kata, wafanyabiashara ambao ni wadau moja kwa moja wa elimu na taasisi mbalimbali  za umma na binafsi.