HUDUMA BORA ZA AFYA ZASOGEZWA KARIBU KWA WANANCHI WA MANISPAA YA SINGIDA

Posted on: August 24th, 2024

Wananchi wa Manispaa ya Singida, hususan mama wajawazito na watoto, sasa wanatarajia kupokea huduma bora za afya baada ya Serikali kuboresha miundombinu katika Hospitali ya Manispaa ya Singida.

Huduma hizo za kisasa zitaanza kutolewa hivi karibuni baada ya kukamilika kwa majengo ya Mama na Mtoto na ya Wagonjwa wa Dharura (EMD).

Daktari Mfawidhi wa Hospitali ya Manispaa ya Singida, Dkt. Hamis Yuna, alieleza kwamba kukamilika kwa majengo haya mawili kutasaidia kupanua wigo wa huduma za afya na kuongeza uwezo wa hospitali kutoa huduma nyingi kwa wakati mmoja.

Dkt. Yuna alisema, “Tunaendelea na ujenzi wa jengo la Mama na Mtoto pamoja na jengo la Dharura. Aidha, tunakarabati jengo la upasuaji ambalo litasaidia kuboresha huduma zetu. Hivi sasa, tunahudumia mama wajawazito 16 kwa wakati mmoja, lakini jengo jipya litakuwa na uwezo wa kuhudumia hadi mama 40 kwa wakati mmoja na kutakuwa na huduma za ziada kama chumba cha upasuaji. Kwa upande wa jengo la dharura, eneo letu la sasa lina uwezo wa kuhudumia wagonjwa watatu pekee, lakini jengo jipya litakuwa na uwezo wa kuhudumia wagonjwa sita kwa wakati mmoja.”

Dkt. Yuna aliongeza kuwa: “Kwa niaba ya wananchi wa Manispaa ya Singida, tunamshukuru Rais wa Jamhuri ya Muungano wa Tanzania, Dkt. Samia Suluhu Hassan, kwa kututambua na kutuboreshea huduma za afya. Tunatarajia kwamba huduma hizi zitakuwa zimeanza rasmi ifikapo mwisho wa mwezi Septemba.”

Mbali na ujenzi huo, hospitali hiyo pia inaendelea na ukarabati mkubwa wa jengo la upasuaji, ambapo huduma za upasuaji zitaanza rasmi ndani ya hospitali, hivyo kuimarisha huduma zinazotolewa kwa wananchi.